- Moitos deles chegaron ao Punto Limpo entre o lixo e outros foron aportados desinteresadamente polos veciños

- Deste xeito preténdese reducir a xeración de residuos e avanzar cara a sostibilidade

^{Valga, 18 de setembro de 2024.}

^{A iniciativa “Fai que Valga”, que a finais do mes de xuño puxo en marcha o Concello para fomentar a reutilización de obxectos usados, está a sen un éxito sen paliativos. Nos apenas dous meses e medio que leva en marcha o programa entregáronse máis de douscentos artigos a outras tantas persoas, evitando que moitos deles acabasen no lixo ao carecer de utilidade para os seus anteriores donos.}

^{A variedade de obxectos aos que se deu unha segunda vida foi grande: xoguetes, roupa de bebé, carros, cunas, bicicletas tanto infantís como para adultos, patíns e patinetes, lámpadas, figuras decorativas, xarróns, diversos electrodomésticos, espellos, libros, utensilios de cociña, ferramentas, barricas de madeira, mobles... Algunhas destas cousas chegaron ao Punto Limpo entre o lixo, pero outras foron aportadas desinteresadamente por veciños que quixeron poñer o seu grao de area nesta iniciativa en prol da sostibilidade e da reciclaxe. O Concello agradécelles a todos a súa contribución, cunha mención especial a unha familia valguesa que aportou unha cama articulada que xa non precisaba e que foi entregada, a través do departamento de Servizos Sociais, a outra persoa dependente do municipio.}

^{Os obxectos do programa “Fai que Valga” que están dispoñibles poden verse no perfil de Facebook do Punto Limpo de Valga ou tamén nas redes sociais do Concello (Facebook, Instagram e Whatsapp). As persoas que estean interesadas nalgún deles teñen que desprazarse a recollelo ao Punto Limpo no seu horario de apertura (luns pola mañá e xoves pola tarde), xa que non se realizan reservas.}

^{Todos os artigos son gratuítos e os seus novos donos non teñen, necesariamente, que ser de Valga. De feito, nestas semanas de funcionamento achegáronse en busca dalgún obxecto persoas procedentes de Vila de Cruces, A Estrada, Cangas do Morrazo, Cuntis, Vilagarcía, Vilanova, Pontevedra, Campolameiro, Padrón, Teo, Brión ou Rianxo, entre outros.}