- Os aprendices de forestais asistiron a unha charla impartida pola mestra composteira, Silvia Torres

- A técnica municipal incidiu, especialmente, na importancia da correcta separación e reciclaxe no ámbito laboral

^{Valga, 10 de setembro de 2024.}

^{O alumnado da especialidade de forestais do Obradoiro de Emprego Ulla-Umia VII participou nunha xornada formativa sobre residuos e compostaxe, que foi impartida pola mestra composteira do Concello, Silvia Torres.}

^{Os aprendices asistiron primeiro a unha charla nas aulas da Escola Taller, na que se lles explicaron nocións básicas sobre a xestión e separación dos distintos tipos de residuos e algúns dos servizos que, relacionados con esta materia, presta o Concello, coma o Punto Limpo.}

^{Abordouse, ademais, a reciclaxe de residuos orgánicos a través da compostaxe, un sistema que o Concello implantou coa colaboración da Deputación e que supuxo, ata o de agora, a creación de tres centros de compostaxe comunitaria e o reparto dun milleiro de composteiros domésticos entre as familias do municipio.}

^{Silvia Torres incidiu na importancia da reciclaxe tamén no ámbito laboral, poñendo énfase na xestión dos residuos orgánicos que son resultado do traballo no ámbito forestal: restos de cortas, podas ou talas.}