- As parroquias de Cordeiro e Xanza son as que rexistraron un maior número de solicitudes veciñais

- O Concello pide aos responsables das cacharelas que extremen a vixilancia para evitar incidentes

^{Valga, 22 de xuño de 2023.}

^{O Concello de Valga tramitou un total de 108 solicitudes de permiso para fogueiras de San Xoán. A parroquia que rexistrou un maior número de solicitudes veciñais foi a de Cordeiro, cun total de 36, seguida de Xanza con 26. En San Miguel de Valga están autorizados 21  lumes, en Campaña 18 e en Setecoros 7.}

^{Para poder cumprir coa tradición na noite máis curta do ano, os veciños tiveron que cubrir un impreso nas oficinas municipais indicando a parroquia e o lugar no que se realizará a fogueira, quedando esta baixo a responsabilidade do solicitante que, coa súa sinatura, se compromete a adoptar as medidas de seguridade necesarias para evitar incidentes e escapes do lume e a cumprir as normas sanitarias que están en vigor.}

^{O listado completo de cacharelas autorizadas foi posto en coñecemento dos servizos de emerxencias, que farán un seguimento para evitar posibles incidentes.}

^{As normas de seguridade que deben cumprir as persoas que vaian a celebrar o San Xoán co acendido de fogueiras son as seguintes:}

• ^{Non facer moreas dunha altura excesivamente elevada para evitar problemas de seguridade}
• ^{Non facer a fogueira preto de lugares con vexetación}
• ^{Con exceso de vento non prender a fogueira}
• ^{Evitar usar nas cacharelas materiais que co vento poidan provocar un incendio (ramas de eucalipto, papeis, etc.)}
• ^{Ter auga preto para actuar ante posibles escapes do lume}
• ^{Non utilizar na fogueira materiais contaminantes (pneumáticos, aerosois, etc.)}
• ^{Deixar a fogueira completamente apagada antes de marchar}
• ^{No caso de ter problemas debe chamar ao 085 ou ao 112 (a chamada é gratuíta)}