- Senllos contratos, valorados en 266.700 e 153.000 euros anuais, poderían prorrogarse ata un máximo de catro exercicios

- Os expedientes de contratación foron aprobados por unanimidade polo Pleno

^{Valga, 1 de marzo de 2023.}

^{O Concello de Valga saca a licitación a xestión da Escola Infantil Municipal e da Escola Municipal de Música, despois de que o Pleno, reunido onte en sesión ordinaria, aprobase por unanimidade senllos expedientes de contratación, así coma os pregos de cláusulas administrativas e de prescricións técnicas polos que se rexerán.}

^{Ambos servizos contrataranse por un período inicial de dous anos, con posibilidade de dúas prórrogas de unha anualidade cada una, ata un máximo de catro exercicios. O valor do contrato está fixado, no caso da Escola Infantil Municipal, en 266.699,90 euros anuais, mentres que o da Escola de Música ascende a 153.000 euros por cada ano.}

^{Ademais, na sesión plenaria, tamén se aprobou por unanimidade solicitar ao Ministerio de Transportes, Mobilidade e Axenda Urbana a cesión en favor do Concello da titularidade dun tramo en desuso da estrada N-550, entre os quilómetros 94 e 95.}

^{Por último, deuse conta ao Pleno do plan anual de control financeiro, do período medio de pago a provedores, do informe sobre o cumprimento dos prazos de pagamento e do informe sobre execución do orzamento correspondentes ao último trimestre de 2022.}