- O Concello aporta os materiais precisos para executar as obras e outorgará gratificacións de 300, 200 e 100 euros

- Os proxectos de acondicionamento son promovidos por veciños das diferentes aldeas e tamén por centros educativos

^{Valga, 4 de agosto de 2021.}

^{Vinte colectivos e comisións veciñais presentaron no Concello os seus proxectos de mellora e acondicionamiento de espazos e infraestruturas públicas cos que concorren ao concurso “Embelecer Valga”. Este certame premia ao lugar máis fermoso acondicionado e engalanado pola cidadanía, co obxectivo de implicar á veciñanza no coidado e arranxo do entorno, acometendo accións de limpeza, mellora, dotación de equipamentos ou ornamentación de paraxes.}

^{Para participar no certame tiveron que formar unha comisión e presentar no Concello unha pequena memoria descritiva das accións de mellora a desenvolver e os materiais que estiman precisos, ademais dunha reportaxe fotográfica do lugar no que se levan a cabo as actuacións. O Concello, pola súa parte, pon a disposición dos participantes os materiais necesarios para o desenvolvemento das obras, que deben estar rematadas na penúltima fin de semana de agosto.}

^{As comisións que concorren ao concurso e os seus respectivos proxectos son:}

1. ^{Barcia: acondicionamento do parque}
2. ^{Beiro: mantemento e limpeza da zona do parque e acondicionamento do lavadoiro}
3. ^{Campaña: melloras no campo da festa}
4. ^{Campaña: embelecemento do cemiterio parroquial}
5. ^{Canle: Reposición de xardíns e outras melloras no parque}
6. ^{Casaldeirigo: limpeza e mantemento no entorno da capela da Saúde e do parque infantil}
7. ^{CEP Xesús Ferro Couselo: acondicionamento dos espazos exteriores do centro}
8. ^{CEIP Baño-Xanza: melloras nas zonas exteriores e de xogos}
9. ^{Cimadevila: embelecemento do entorno do lavadoiro}
10. ^{CRA de Valga: acondicionamento de patios escolares}
11. ^{Eiras: arranxo de fonte e lavadoiro}
12. ^{Escola Infantil Municipal: arranxos no exterior do centro}
13. ^{Ferreirós: mellora do parque infantil}
14. ^{Gándara: reparacións no parque}
15. ^{IES de Valga: embelecemento dos espazos exteriores do instituto}
16. ^{Instalacións deportivas: acondicionamento e mellora das zonas deportivas de Baño e Campaña}
17. ^{Raxoi: Limpeza e mellora de fonte e lavadoiro}
18. ^{Setecoros. embelecemento da zona exterior do cemiterio parroquial}
19. ^{Vilar: acondicionamento do parque e do lavadoiro}
20. ^{Vilarello: mellora do parque, casa veciñal e lavadoiro}

^{O xurado encargado de valorar cada unha das actuacións estará integrado por representantes de cada comisión veciñal participante. O proxecto mellor valorado será premiado cun agasallo, diploma e 300 euros e o segundo e terceiros clasificados recibirán os mesmos galardóns coa excepción da cantidade económica, que ascenderán a 200 e 100 euros respectivamente. As demais comisións presentadas recibirán unha gratificación de 100 euros.}

^{Ademais, entregarase un premio especial de 150 euros á comisión que realice un mellor mantemento do lugar durante todo o ano.}