- Dezasete barcos, entre dornas, gamelas e galeóns, reuníronse nesta actividade organizada pola Fundación Rosalía

- A concelleira de Turismo, Malena Isorna, presenciou a saída dende a praia fluvial

^{Valga, 24 de xullo de 2021.}

^{¡Que inchadiña branca vela}

^{antre os millos corre soa,}

^{misteriosa pura estrela!}

^{Dille o vento en torno dela:}

^{«Palomiña, ¡voa!, ¡voa!»}

^{Estes versos de Rosalía de Castro dan nome á actividade “Inchadiña branca vela”, que se celebrou esta tarde en homenaxe á poetisa de Padrón. Dezasete embarcacións tradicionais tomaron a saída dende a praia fluvial de Vilarello e subiron os ríos Ulla e Sar.}

^{Dornas de distintos tipos, gamelas, galeóns, un bote, un carocho, unha buceta e un volanteiro chegados das rías de Arousa, Pontevedra, Vigo e Ribadeo e tamén da Guarda participaron na iniciativa organizada pola Fundación Rosalía de Castro e a asociación cultural Dorna, coa colaboración do Concello de Valga.}

^{A concelleira de Turismo, Malena Isorna, achegouse ata Vilarello para dar a benvida a Valga ás xentes do mar e presenciar o inicio da sigradura, que se prolongou durante unhas dúas horas e tivo como punto de chegada o Paseo do Espolón, en Padrón, onde continuaron as homenaxes a Rosalía.}

^{Membros da agrupación de Protección Civil de Valga acompañaron cunha embarcación aos participantes na ruta fluvial, para garantir a seguridade da mesma.}

^{Esta actividade celebrouse por vez primeira no ano 2013, para conmemorar o 150 aniversario da publicación do libro “Cantares gallegos”.}