- As probas comezaron a pasada fin de semana coa participación de 50 aspirantes

- “Atopamos moi boa predisposición por parte da dirección” do centro, destaca o presidente do tribunal

^{Valga, 23 de xuño de 2021.}

^{As instalacións do IES de Valga foron as escollidas pola Consellería de Educación para desenvolver as oposicións da especialidade de Soldadura.}

^{Os exames da oferta pública de emprego educativa deron comezo o pasado sábado coa primeira proba práctica, que se desenvolveu baixo a carpa instalada polo Concello durante este curso para que o alumnado puidera saír ao patio en días de chuvia cumprindo os protocolos anti-Covid. Este era o espazo máis axeitado para albergar a todos os opositores mantendo as condicións de seguridade, explican dende a dirección do centro.}

^{A estas probas estaban convocadas un total de 71 persoas, das que asistiron 50. O número de prazas dispoñibles é de 20. O procedemento selectivo prolongarase durante varias semanas, ata o 21 de xullo, e os exames máis inminentes celebraranse hoxe mércores e o venres. Serán probas nas que os opositores terán que demostrar as súas aptitudes técnicas e o coñecemento do temario específico da especialidade.}

^{As oposicións de Educación celébranse nesta ocasión de forma descentralizada debido á pandemia. É a primeira vez que se realizan probas fóra das grandes cidades, en concreto en 23 localidades galegas, entre elas Valga. As instalacións do IES ofrecen “uns talleres moi amplos e con boas condicións nos que traballar”, apunta o director do instituto, Eliseu Mera, como un dos motivos que  puido influír á hora de elixir a Valga como sede.}