Accessibility Tools

NOVAS DO CONCELLO

- A peza, de gran valor patrimonial, pertence ao coñecido como “estilo Setecoros” e é semellante a outra que se conserva no Museo da Catedral

- O Concello agradece á familia Freire Lorenzo a doazón desinteresada, moi importante para seguir recuperando e divulgando a historia de Valga

CesionCapitel1

Valga, 11 de marzo de 2021.

A familia Freire Lorenzo, de Ferreirós (Cordeiro), vén de ceder definitiva e gratuitamente ao Concello un capitel de época romana achado na horta da súa casa. O alcalde, José María Bello Maneiro, e Loli Freire Lorenzo asinaron esta mañá o documento de cesión que permite incorporar esta peza aos fondos do Museo da Historia, no que se exporá despois de ser sometida a un proceso de limpeza e restauración.

A familia sempre recorda esta pedra na súa horta, sen que lle deran maior importancia. Recentemente, con motivo duns traballos a realizar na parcela, movérona de lugar e foi entón cando lles advertiron sobre o valor patrimonial que podía ter. Tras poñerse en contacto co Concello, técnicos municipais desprazáronse a Ferreirós a ver a peza, apreciando dende un primeiro momento que podía tratarse dun capitel do coñecido como “estilo Setecoros” e moi similar e do mesmo período que outro que se conserva no Museo da Catedral de Santiago, datado entre os séculos III e IV (época tardorromana).

Ademais, á espera da súa limpeza, tamén parece ser do mesmo material: mármore de O Incio, pedra específica deste estilo arquitectónico da que tamén están feitos os dous fustes de columna e os dous capiteis que se conservan na Igrexa de San Salvador de Setecoros.

Logo deste primeiro análise dos técnicos municipais, o achado foi comunicado á Dirección Xeral de Patrimonio da Xunta de Galicia. Técnicos deste organismo desprazáronse a Valga para analizar o capitel, chegando ás mesmas conclusións. Actualmente estase á espera do informe definitivo de Patrimonio.

Coa sinatura da cesión, o capitel atópase xa no Museo. Tecnicamente pertencería aos comezos do “estilo Setecoros”. Pode apreciarse perfectamente a decoración vexetal que forma varios aneis que sobresaen en diferentes niveis. Posteriormente, o estilo evolucionou cara un traballo máis minucioso, incorporando, por exemplo, zonas encordadas.

Tamén é destacable o feito de que semella que nalgún momento se lle deu algún uso a esta peza, posto que presenta un furado e unha rotura na súa parte superior.

Ata o de agora só se tiña coñecemento da conservación de oito destes capiteis: catro no Museo de Pontevedra, dous no Museo da Catedral e outros dous na propia igrexa de Setecoros. Deles tan só un dos da Catedral presenta a mesma factura que o achado en Ferreirós.

O Concello quere transmitir á familia Freire Lorenzo o seu agradecemento pola súa cesión desinteresada deste elemento patrimonial “de moita importancia para seguir recuperando e divulgando a historia de Valga”, destacou o alcalde.

No mesmo sentido, o técnico municipal responsable do Museo da Historia, Santiago Chenlo, refírese ao “gran valor que ten para a difusión da cultura local e, especialmente, na súa vertente educativa e pensando nas novas xeracións, posto que as visitas de centros educativos son habituais no Museo”.

Ademais, recalca outro aspecto moi importante que se desprende deste achado: “É unha comprobación de que nas casas dos nosos veciños aínda se conservan elementos de gran interese. A xente debe valorar o patrimonio que poida ter no seu entorno e concienciarse sobre a importancia de non deterioralo. E, en caso de que sospeiten que algunha peza pode ter relevancia patrimonial, comunicalo”.

CesionCapitel2 CesionCapitel3

CapitelSetecoros

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver