- Investiranse 180.000 euros en actuacións de pavimentación, nova iluminación, melloras no saneamento e na recollida de augas e acondicionamento do lavadoiro

- Habilitaranse dúas escaleiras para permitir o acceso dende a estrada N-550

Rúa Baixa

Valga, 8 de febreiro de 2020.

A Dirección Xeral de Arquitectura, Vivenda e Solo do Ministerio de Fomento sacou a contratación o proxecto de reurbanización da Rúa Baixa e do entorno do Centro de Interpretación da Caña do País, unha actuación deseñada polo Concello e que conta cun orzamento de 179.999’68 euros. Recolle obras como a pavimentación, a mellora dos servizos de saneamento, recollida de augas e iluminación e o acondicionamento do lavadoiro existente na zona, entre outras.

A Rúa Baixa, que arranca na estrada N-550 e chega ata a ribeira do río Valga, ten un carácter singular, xa que comeza como unha rúa urbana e, no seu devir, transfórmase en sendeiro. A paisaxe vai cambiando ao seu carón, de construída a entorno natural. Hai que destacar, porén, que se trata dunha rúa que acolle tres fitos dentro do seu percorrido: o Museo da Historia, o Centro de Interpretación da Caña do País e un interesante lavadoiro.

As obras que se levarán a cabo no marco deste proxecto inclúen a pavimentación da Rúa Baixa combinando formigón e granito do país en pezas de grande formato. A pedra colocarase nas zonas máis nobres –entradas dos edificios, fronte ao Museo da Historia e a Praza do Concello– para poñer en valor os puntos salientables do percorrido. Tamén se levarán a cabo melloras no saneamento e na recollida de augas pluviais.

Para mellorar o acceso ao Centro de Interpretación da Caña habilitarase un camiño formado por pezas de formigón con formatos variables. No exterior do edificio crearase unha zona axardinada e incorporarase mobiliario urbano.

A intervención para a posta en valor do lavadoiro é unha cuestión principal dentro do proxecto. Búscase liberar esta peza constrinxida entre terreo, muros, escaleiras e volumes edificados. Para isto, procederase á demolición das escaleiras da edificación existente, os aseos, o almacén e tamén os chanzos de baixada á pía de lavado, que se substitúen por unha rampa para facela máis accesible.

Disporase no seu arredor un pavimento de lousas de granito e colocaranse bancos e luminarias para a valorización tanto da pía coma do espazo adxacente á mesma. A edificación existente sobre o lavadoiro revestirase con entaboado vertical de madeira, buscando a súa mellor integración na paisaxe.

A carón do lavadoiro proxéctase un pequeño aparcadoiro executado con terra estabilizada. Ademais, melloraranse os accesos dende a estrada N-550 coa construción de dúas escaleiras aproveitando o talud existente.

As melloras neste entorno afectarán tamén á iluminación, coa dotación de equipos de alta eficiencia enerxética mediante o uso de lámpadas LED, que permitirán reducir os custos de mantemento.

boton auditorio

boton edificio usos admin

boton casa cultura

boton codi

boton facebookboton twitter   boton youtube

boton cita previa sede

boton sede electronica

boton bella otero

boton rueiro

boton tokapp

boton directorio

boton tempo

Volver