- Desenvolverase entre os días 28 e 29 e o prezo da matrícula é de 90 euros por alumno

- As inscricións na actividade poden realizarse a través da páxina web www.csmgalicia.com

^{Valga, 29 de outubro de 2019.}

^{André Cebrián, mestre de frauta do Centro de Ensinanzas Superiores de Música de Valga, impartirá no mes de novembro no Auditorio Municipal unha masterclass á que poden asistir tanto alumnos deste centro como outros externos. A actividade, organizada en colaboración co Concello de Valga, desenvolverase entre os días 28 e 29 e o prezo da matrícula é de 90 euros para os alumnos activos e 30 para os oíntes.}

^{O obxectivo da clase maxistral é profundizar e complementar os estudos de frauta dos asistentes, mellorar os aspectos técnicos do instrumento así como aspectos estilísticos, fraseo e expresión. Constará de dúas clases individuais por alumno activo, nas que se traballará un repertorio, e dúas clases colectivas nas que se abordarán cuestión principalmente técnicas.}

^{As inscricións poden realizarse a través do enlace https://docs.google.com/forms/d/e/1FAIpQLSe4h5c-XtGzW2EZHBWBvpBpwX0za5mGymdAISYyULXj3Q8wdA/viewform .}

^{André Cebrián é dende 2013 profesor de frauta e música de cámara no Conservatorio Superior de Música de Aragón e agora tamén no de Valga. Natural de Santiago de Compostela, actuou como solista xunto á Orquestra Sinfónica de Galicia, a Sintónica de Castela e León, a Orquestra da Academia de Música de Cracovia ou a Orquestra de Cámara Gallega. Ao longo da súa traxectoria tocou baixo a batuta de directores como David Afkham, Lionel Bringuier, Antonio Pappano, Gianandrea Noseda, Sir Colin Davis ou Franz Wesler-Möst.}

^{Impartiu cursos e clases maxistrais en diferentes escolas, conservatorios e orquestras como os conservatorios de Pontevedra, Santa Cruz de Tenerife, Ferrol, Huesca ou Granada a Academia Nacional de Música de Estonia, a Orquestra Sinfónica de Ávila ou as orquestras das universidades de Santiago e Pamplona e a OECCh en México.}

 ^{Ademais desta actividade, o Centro de Ensinanzas Superiores ten programadas outras dúas masterclass para o mes de decembro: o día 9 de piano jazz a cargo de Abe Rábade, e os días 26 e 27 de saxofón cos mestres Adrián Pais e Xabier Casal. Pode obterse máis información sobre elas a través da web www.csmgalicia.com}