- As entradas xa poden adquirirse por 5 euros no Concello, no Auditorio, no CODI e en Radio Valga

- Parte do diñeiro recadado destinarase a financiar as actividades que organiza Asdivalu para persoas con discapacidade intelectual

^{Valga, 10 de xaneiro de 2019.}

^{A obra de teatro “Deus nos colla confesados”, que a compañía Zinco3 Audiovisuais estrea o vindeiro día 19 no Auditorio Municipal, colectará fondos para colaborar con Asdivalu, asociación de persoas con discapacidade dos vales Ulla e Umia. Parte dos recursos que se recaden nesta función irán destinados a sufragar o funcionamento deste colectivo, que organiza entre outras actividades sesións de musicoterapia e de balneario para persoas con discapacidade intelectual.}

^{A función terá lugar a partir das 20 horas do sábado 19 e as entradas teñen un prezo de 5 euros por persoa. Xa poden adquirirse tanto no Auditorio coma nas oficinas do Concello, no CODI e tamén en Radio Valga. O propio día da estrea tamén poderán mercarse no despacho de billetes do Auditorio.}

^{As risas están aseguradas con “Deus nos colla confesados”, unha comedia rural protagonizada polo locutor de Radio Valga Pedro da Devesa (que tamén se encarga do guión e da dirección da obra), Manuel Liste e Antía Castro. O equipo complétano dúas persoas responsables da produción.}

^{Baseada nalgunhas anécdotas reais que Pedro da Devesa viviu durante a súa etapa como sancristán en Campaña, a obra relata a historia dun novo cura que chega á parroquia. Alí atópase con Fito, un enterrador moi particular xunto ao que vivirá non poucas andanzas. Case en paralelo chega tamén ao lugar unha monxa moza e moderna á que envían dende o convento para realizar o seu traballo de fin de estudos. O roubo da reliquia do patrón da parroquia a poucos días da festa grande desencadeará moitas sorpresas e tramas humorísticas.}

^{Este proxecto teatral comezou a xestarse hai meses, cando a Pedro da Devesa e a Manuel Liste lles propuxeron participar nunha gala benéfica. Idearon para a ocasión os personaxes do cura e o enterrador e tiraron dun humor moi galego e moi rural. “Foi un éxito, houbo moitas risas entre o público”, comenta Pedro, polo que decidiron manter os personaxes e incluso participaron con eles en varios programas de televisión como Luar. “Foi a partir de aí cando comezamos a pensar en montar unha obra”, explica. “E, xa que se vai estrear no meu concello, que menos que poder colaborar cunha asociación local como Asdivalu, sobre todo tendo en conta a problemática que está a haber coa financiación do CODI. Ademais de axudar, é unha forma de dar a coñecer o traballo da asociación e o servizo que presta o CODI de Valga”. Por iso, Pedro da Devesa anima a todos os veciños a asistir ao espectáculo. “Cantos máis sexamos, máis diñeiro imos xuntar para a asociación”, remarca.}

^{Trala función de Valga, xa están programadas outras dúas representacións en Ribadumia o día 22 de febreiro para escolares e o 23 do mesmo mes para o público en xeral.}