- O alumnado das unitarias de Chenlo, Campaña, Vilarello, Forno, Fereirós e Xanza pediulle moitos regalos para Noiteboa

- A conexión realizouse dende a Aula CeMIT do Auditorio

^{Valga, 12 de decembro de 2018.}

^{A ilusión coa que os máis pequenos viven as festas de Nadal reflexouse nos rostros dos case sesenta nenos que tiveron a oportunidade de falar con Papá Noel a través de videoconferencia dende a Aula CeMIT do Auditorio.}

^{Diante da súa casa en Laponia e rodeado dunha paisaxe nevada, Santa Claus conectou dúas veces con Valga para escoitar a lista de regalos que lle pediron os alumnos das escolas unitarias de Vilarello, Ferreirós, Forno, Campaña, Xanza e Chenlo. En total 56 alumnos nenos do Centro Rural Agrupado tiveron ocasión de conversar con Papá Noel. Portáronse todos moi ben durante este ano, comeron todo o que llse puxeron no prato, axudaron ao seus pais coas tarefas da casa, estudaron moito no colexio e o que máis lles gusta do Nadal é abrir regalos. Por iso, Santa Claus foi tomando nota de todos os xoguetes que vai ter que traer a Valga no seu trineo en Noiteboa.}

^{Entre as peticións máis repetidas estiveron as bonecas e os coches, pero a lista de desexos dos rapaces valgueses inclúe tamén motoserras, motos de auga, patíns, vestidos de princesa e ata houbo quen lle pediu unha formigoneira e un maletín de médico. Moito van ter que traballar os elfos de Santa Claus para fabricar todos os xoguetes que queren os nenos de Valga.}

^{Pola súa parte, Papá Noel pediulles aos pequenos que en Noiteboa lle deixen baixo a chimenea ou xunto á árbore de Nadal un vasiño de leite con galletas para repoñer forzas e unhas cenorias para os nove renos cos que viaxará por todo o mundo: Godín, Danzarín, Pompón, Xoguetón, Cometa, Cupido, Trono, Relámpago e, o seu favorito, Rudolf.}