- A imaxe da Virxe foi ofrecida polos irmáns María e José Manuel Castelao, nados nos Martores e emigrados a Arxentina

- Unhas 160 persoas reuníronse, tralos actos relixiosos, nunha comida popular nos arredores da capela

^{Valga, 29 de setembro de 2018.}

^{O alcalde de Valga, José María Bello Maneiro, asistiu esta mañá na capela dos Martores ao acto de entronización dunha imaxe de Nosa Señora de Luján ofrecida polos irmáns María e José Manuel Castelao, nados nesta aldea da parroquia de San Miguel e emigrados a Bos Aires no ano 1955. Entre as autoridades tamén se atopaba a directora de Relacións Institucionais e Parlamentarias da Consellería de Presidencia da Xunta de Galicia, Blanca García Señoráns.}

^{O acto na capela de San Mamede, construída entre os séculos IV e V, contou coa participación do deán da Catedral de Santiago, Segundo Pérez López, e foi oficiado polo cesueño Elisardo Temperán Villaverde, canónigo da Catedral compostelana e con ascendentes nos Martores. Acompañounos tamén  o párroco de San Miguel de Valga, Arturo Lores. A misa foi cantada pola Coral Polifónica Santa Comba de Cordeiro.}

^{A Virxe de Luján, que celebra a súa festividade o día 8 de maio, é a patroa da Arxentina. O ofrecemento dos irmáns Castelao é “un acto de gratitude polo amparo que moitos galegos”, entre eles numerosos valgueses, “atoparon na terra arxentina”.}

^{Tralo acto  tivo lugar nos arredores da capela unha comida na que participaron unhas 160 persoas, entre autoridades, veciños dos Martores e das aldeas próximas de Vilares, Laceiras, Raxoi ou Requián.}