- O trámite debe realizarse canto antes para entrar no proceso de selección do alumnado

- Vinte desempregados formaranse nas especialidades de albanelería e traballos forestais

^{Valga, 17 de setembro de 2018.}

^{O Concello de Valga, xunto co de Moraña e co respaldo económico da Consellería de Industria, vai poñer en marcha un novo Obradoiro de Emprego para vinte persoas desempregadas.}

^{Os interesados en participar neste proxecto formativo teñen que estar inscritos como demandantes de emprego e acudir á oficina do Servizo Público de Emprego (SEPE)  en Vilagarcía para anotarse nun dos dous módulos dos que constará o obradoiro: albanelería e traballos forestais.}

^{Aínda que non hai un prazo establecido para formalizar este trámite, o Servizo de Orientación Laboral do Concello recomenda realizalo canto antes xa que o Servizo Público de Emprego pode pechar as listas en calquera momento e sen previo aviso. As persoas anotadas participarán despois nun proceso de selección que constará de varias entrevistas e do que sairán os vinte alumnos do Obradoiro de Emprego Ulla-Umia III. Terán preferencia os desempregados empadroados nos dous concellos promotores, Valga e Moraña.}

^{Para máis información sobre como anotarse para entrar no proceso selectivo, poden dirixirse ao Servizo de Información e Orientación Laboral do Concello.}

^{O obradoiro Ulla-Umia III consta de dous módulos de construción e acondicionamento forestal. A metade dos alumnos, dez, obterán os certificados de profesionalidade de Operacións auxiliares de revestimentos en construcións e de Fábricas de albanelería, mentras que a outra metade o de Actividades auxiliares en conservación e mellora de montes.}

^{A formación teórica compaxinarase coa práctica mediante a realización de obras de utilidade pública. Neste caso, os traballos que se proxectan en Valga son o acondicionamento do Camiño Portugués, a continuación das obras no edificio de usos administrativos, o arranxo dos aseos e vestiarios do ximnasio municipal e a mellora de zonas de lecer como a praia fluvial de Vilarello ou o miradoiro de Beiro.}

^{A Xunta de Galicia aprobou unha aportación económica de 288.807 euros para financiar este obradoiro.}