- A solta de vaquiñas e o espectáculo ecuestre de Santi Serra foron os grandes alicientes da tarde

- Manuel Morgade recibiu o trofeo ao mellor toureiro

^{Valga, 2 de xullo de 2018.}

^{A Festa da Xuventude viviu onte unha das xornadas de maior asistencia de público dos últimos anos, coa solta de vaquiñas e o espectáculo ecuestre de Santi Serra como principais atractivos. Milleiros de persoas ateigaron a praza móbil instalada na área lúdica de Vilarello para aplaudir as actuacións dos recortadores de Arte y Emoción e dos afeccionados locais ante Rodadora e Ojalada, as dúas vaquiñas da gandería Toros de Brazuelas de Valladolid.}

^{A Cuadrilla de Tito de Victoriano deu o pistolezado de saída á solta co seu xa tradicional paseíño cheo de gracia. Os espectaculares saltos, recortes e caneos dos recortadores profesionais e a valentía da que fixeron gala os toureiros valgueses foron un aliciente máis para un público que, pese á desagradable climatoloxía e ao partido do Mundial que disputaba a selección española, acudiu en masa a esta cita anual. Manuel Morgade levou o trofeo ao mellor toureiro da tarde, Esteban da Cuadrilla de Tito de Victoriano foi distinguido como o máis simpático e Manuel Rodríguez como o toureiro de máis idade. O equipo de Casaldeirigo proclamouse gañador do partido de fútbol-vaca que se disputou no ruedo.}

^{Trala solta deu comezo un dos momentos máis agardados da tarde e que atraeu a Valga a numerosos espectadores foráneos: o espectáculo ecuestre do televisivo domador Santi Serra. A actuación do gañador de “Tú sí que vales” foi impresionante, en perfecta comuñón e entendemento cos catro cabalos e dous cans que tomaron parte no show de doma en liberdade.}