- A primeira charla, sobre como sacar o máximo beneficio ás tendas en liña, terá lugar o martes

- O luns día 4 está programada, ademais, unha xornada sobre contratación de viaxes

^{Valga, 1 de xuño de 2018.}

^{A Aula CeMIT de Valga ofrece durante o mes de xuño un ciclo de catro conferencias sobre comercio electrónico, impartidas polo Centro Demostrador TIC de Galicia dentro do programa #MesD e dirixidas a xerentes, responsables ou persoal técnico de empresas e negocios de calquera sector.}

^{A primeira sesión formativa terá lugar o vindeiro martes, 5 de xuño, a partir das 16 horas. Baixo o título de “As claves para o éxito”, o seu obxectivo é ofrecer información e coñecementos e ampliar a visión sobre o comercio electrónico a través dos modelos que máis beneficios reportan. Os asistentes sairán da charla sabendo que é e como funciona o comercio electrónico e como desenvolver unha estratexia para conseguir o máximo beneficio nas tendas en liña.}

^{O programa inclúe os seguintes contidos: O comercio electrónico B2C en España; claves dos modelos de negocio que funcionan e que non funcionan; ecuación de ingresos e claves do marketing dixital; ecuación de marxe e claves loxísticas e de medios de pago; captación, conversión e custo.}

^{Nas tres semanas seguintes haberá outras tres videoconferencias. O día 12 de xuño sobre prezos e competencias, o 19 de xuño centrada nas campañas de promoción e o 26 de xuño sobre plataformas e tendas.}

^{Contratación de viaxes}

^{Ademais, para o próximo luns 4 de xuño está programada outra actividade na Aula CeMIT: unha charla sobre a contratación de viaxes, neste caso a cargo da Escola Galega de Consumo.}

^{A partir das 12 da mañá explicaranse os dereitos que protexen aos consumidores á hora de contratar viaxes, fundamentalmente a través de internet. Dispoñer da información necesaria é importante para ser consumidor responsable e, por iso hai que tomar certas precaucións e seguir unha serie de consellos como elixir ben a axencia de viaxes ou usar pasarelas de pago.}

^{Tanto para esta charla como para os coloquios sobre comercio electrónico requírese inscrición previa, que pode realizarse na propia Aula CeMIT, emprazada no Auditorio Municipal, ou a través do seguinte enlace: https://cemit.xunta.gal/gl/actividades?idCentro=77}