- A actividade, organizada polo CIM e os concellos de Valga e Pontecesures, tivo lugar esta mañá con saída e chegada no CODI

- Os participantes recibiron unha camiseta conmemorativa, un chaveiro e o novo tríptico do CIM con información sobre os seus servizos

^{Valga, 8 de marzo de 2026.}

^{A andaina “Camiñamos pola igualdade”, organizada conxuntamente polo CIM e os concellos de Valga e Pontecesures, conmemorou esta mañá o Día Internacional da Muller, unha data que enxalza a histórica loita das mulleres por acadar a igualdade en todos os ámbitos sociais e que pon énfase no camiño que aínda queda por percorrer para que este obxectivo se consiga.}

^{Foron 150 as persoas que se inscribiron, non só dos dous concellos promotores, senón chegadas doutras vilas coma Dodro, Rois, Padrón, Rianxo, Vilagarcía ou Ames, entre outro.}

^{Percorreron un traxecto de 13 quilómetro con saída e chegada no CODI, en Baño. Dende alí o grupo dirixiuse cara a Pontevalga para atravesar o Parque Irmáns Dios Mosquera e subir ata San Miguel. Alí enlazaron co trazado do Camiño Portugués en dirección a Pontecesures. Pasaron polo Miradoiro do Pino Manso, en dirección á prazuela, onde se estableceu un punto de avituallamento.}

^{Despois retomaron a ruta pola beira do río Ulla cara a Porto e Campaña. A última parte da ruta, de dificultade media-baixa, discorreu pola Mina Mercedes e, xa de regreso cara o CODI, polo Carballiño.}

^{Os inscritos recibiron como agasallo unha camiseta conmemorativa do 8-M, un chaveiro e tamén se repartiron os novos trípticos do Centro de Información á Muller, con información dos servizos que ofrece.}