- A concelleira Malena Isorna, a presidenta da Sociedade Española da Camelia e o deputado Javier Tourís participaron no acto de inauguración

- A mostra itinerante atópase na zona exterior do Auditorio, composa por paneis que desvelan curiosidades sobre esta flor

^{Valga, 27 de xaneiro de 2026.}

^{A semana da camelia en Valga quedou inaugurada esta mañá coa presentación da exposición “A camelia, flor de galegos e galegas”, unha iniciativa de carácter itinerante que pode verse ata o vindeiro 3 de febreiro nos exteriores do Auditorio Municipal.}

^{Os concelleiros Manela Isorna e José Ángel Souto participaron no acto inaugural da mostra, promovida pola Sociedade Española da Camelia coa colaboración da Deputación Provincial. En representación destas dúas entidades estiveron a presidenta da SEC, Carmen Salinero, e o deputado Javier Tourís. Acompañounos Rosa Crespo, a presidenta de honra da asociación Albor, que celebra esta fin de semana a XVIII edición da Mostra da Camelia Bella Otero, tamén no Auditorio.}

^{A exposición está composta de paneis con imaxes e textos que desvelan algunhas curiosidades sobre a camelia. “Para o Concello é un pracer acoller esta iniciativa”, que completa a terna de actividades que durante os vindeiros días converterán a Valga en capital da camelia, sinalou Malena Isorna referíndose á Mostra Bella Otero dos días 31 de xaneiro e 1 de febreiro e á exposición de pintura "Pintando entre camelias", de Rosa Crespo, que permanecerá no Auditorio ata finais de febreiro.}

^{Carmen Salinero apuntou que esta exposición itinerante xurdiu na época da pandemia, cando por motivos sanitarios non podían celebrarse os habituais encontros de coleccionistas de camelias. “Non queriamos que a xente se olvidara desta flor”, tan vencellada a Galicia. A presidenta da Sociedade Española puxo en valor as 18 edicións da Mostra Bella Otero que se levan celebradas en Valga. “A asociación Albor e Rosa Crespo conseguiron que esta exposición sexa de Valga e para Valga, traballando con afeccionados locais e con flores cultivadas aquí. É moi reseñable o que se está a conseguir a nivel local en relación á camelia”.}

^{Por último, o deputado Javier Tourís remarcou o importante papel que a camelia xoga na desestacionalización turística, “cos grandes xardíns que temos nas Rías Baixas. Por iso seguiremos apostando por esta flor”.}

^{Tralo acto, as autoridades e o público asistentes realizaron un percorrido polos paneis e participaron nunha degustación de té de camelia elaborado na Estación Fitopatolóxica do Areeiro con brotes de follas desta árbore.}