- O evento busca concienciar sobre as novas formas de delincuencia na rede e ofrecer ferramentas para combatelas

- Obradoiros, conferencias ou concursos integran a programación deste encontro, dirixido a profesionais pero tamén ao público xeral

^{Valga, 7 de novembro de 2025.}

^{Trinta usuarios da Aula CeMIT de Valga asistiron esta mañá ao Encontro Galego de Ciberseguridade, que dende o pasado mércores celebra a súa quinta edición no edificio Fontán da Cidade da Cultura, en Santiago. A delegación valguesa, que encabeza a responsable da Aula CeMIT, Vanessa Losada, partiu pasadas as dez da mañá do Auditorio Municipal rumbo a Compostela, onde están a participar nas diferentes actividades que ofrece este encontro, centrado na seguridade dixital.}

^{A ciberdelincuencia é unha das principais ameazas do desenvolvemento tecnolóxico e sobre iso debatiron durante últimos días expertos e profesionais do sector, co obxectivo de poñer freo ás novas formas de delincuencia na rede, pero tamén de concienciar á cidadanía sobre o uso seguro das tecnoloxías, poñendo á súa disposición información e ferramentas para a súa seguridade.}

^{Obradoiros, conferencias, paneis de debate, representacións teatrais sobre a viralidade nas redes sociais ou concursos de ciberseguridade son algunhas das actividades que, nestes días, veñen desenvolvéndose no Gaiás, no marco deste encontro organizado pola Axencia para a Modernización Tecnolóxica de Galicia (Amtega) e o Nodo CIBER.gal, coa colaboración do Colexio Profesional de Enxeñaría en Informática de Galicia (CPEIG).}

^{Unha das actividades nas que participaron os usuarios valgueses foi Conecta Sénior, para coñecer de forma práctica e amena como aproveitar as novas tecnoloxías no seu día a día e claves para navegar por internet con seguridade e previr riscos dixitais.}

^{Ao remate, puideron degustar uns aperitivos e participaron no sorteo de varios agasallos. Herminia Magariños e José Manuel Pérez gañaron unha tablet cada un e Santiago Rodríguez, unha mochila.}