- Esta tarde celebrouse unha recepción na Casa do Concello e mañá serán partícipes dos actos festivos
- Visitaron espazos coma a Mina Mercedes e as fervenzas, achegáronse á romería dos Milagres e asistiron ao Concurso da Caña do País
Valga, 29 de agosto de 2025.
As xornadas máis festivas do ano son tamén datas de reencontros para representantes do Concello de Valga e dalgúns dos seus pobos irmáns. Nesta ocasión, son dúas delegacións chegadas dende Prat de Comte (Tarragona) e Valka (Letonia) as que gozarán das actividades desta XXXV Festa da Anguía e Mostra da Caña do País e aproveitarán para seguir coñecendo recunchos e tradicións locais.
Os representantes de Prat de Comte foron os primeiros en chegar, ao mediodía do xoves. Entre eles atópase o alcalde, Miquel Trilla, ao que acompañan a tenente de alcalde, Montse Viña, a concelleira Montse Subirats e colaboradora do goberno municipal Miryam Pi Díez. Na súa primeira xornada en Valga visitaron espazos coma as fervenzas ou a Mina Mercedes, tamén se achegaron a pulsar o ambiente da romaría dos Milagres de Requián e, por último, asistiron á precata do Concurso da Caña do País, interesándose por cales son os criterios que seguen os catadores para valorar as augardentes das distintas variedades.
Valga e esta localidade catalá estreitaron lazos a comezos dos anos 2000, cando se celebrou en Prat de Comte a primeira edición da Festa da Augardente. Daquela, un grupo de veciños e representantes valgueses, do que formaban parte varios cañeiros, desprazáronse alí por vez primeira para explicarlles o método de destilado da augardente que se segue en Valga.
E dende Valka (Letonia) chegou esta tarde Vents Armands Krauklis, que fai uns meses foi elixido de novo alcalde da localidade báltica. Con ela asinouse un convenio de irmandamento en e 2018, co obxectivo de promover actividades de carácter cultural e educativo, entre outras.
Esta tarde tivo lugar na Casa do Concello unha recepción oficial aos visitantes por parte do alcalde, José María Bello Maneiro, a segunda tenente de alcalde, Carmen Gómez, e o concelleiro de Cultura, Pedro Calvo. Recibiron como agasallo a botella conmemorativa desta XXXV Mostra da Caña do País.
O rexedor de Prat de Comte, pola súa parte, fixo entrega ao goberno local de Valga dun cadro no que aparece representada a vila tarraconense, que quedou colgado na planta principal da Casa Consistorial.
