- Representantes do Club Acuático Umia achegáronse ao recinto escolar de Baño para explicarlles aos cativos en que consiste o seu deporte

- Despois todos participaron nunha gran festa de despedida

Valga, 29 de agosto de 2025.
A Escola de Verán viviu hoxe unha xornada de despedida. Clausurou a súa actividade despois de dous meses nos que nenos e mozos de entre 3 e 14 anos de idade participaron nesta iniciativa de conciliación estival promovida polo Concello, que puxo a disposición das familias valguesas un total de 200 prazas.

O remate da quenda final de agosto combinou actividades moi dispares. Por unha parte, unha visita de representantes do Club Acuático Umia para explicarlles aos rapaces en que consiste a disciplina que practican (o salvamento acuático deportivo), que se pode desenvolver tanto en piscina como en praia e que simula o rescate de persoas empregando manequíns e sorteando obstáculos.

Varios deportistas de Valga forman parte deste club con sede en Caldas de Reis, polo que animaron aos participantes das Escola de Verán a probar a práctica do salvamento. Unha boa oportunidade será as xornadas de portas abertas que celebrarán a vindeira semana (martes, xoves e sábado). A inscrición pode realizarse de balde na ligazón http://bit.ly/4fZBpqP .

Unha vez rematada esta actividade, o ambiente tornou en festivo cunha sesión de discoteca na que non faltaron a música e os bailes e as luces de neón. Para gozar dela, os alumnos ata cambiaron o seu look con modernos e coloridos peiteados.