O certame arrancou onte coa precata, na que o xurado realizou unha primeira selección de augardentes

Esta tarde celebrarase no Centro de Interpretación da Caña a cata final, na que se elixirán aos gañadores

^{Valga, 29 de agosto de 2025.}

^{Nas vésperas do día grande da XXXV Festa da Anguía e Mostra da Caña do País, a augardente acapara protagonismo da man do Concurso Tradicional da Caña, que onte deu comezo coa celebración da precata.}

^{Foron un total de 34 os licores presentados ao certame nas súas tres variedades habituais: catorce brancos, once de herbas e nove tostados. Exerceron como catadores Ricardo Abuín Mariño, Juan Carlos García Busto, Mª Luisa Vázquez Tubío, Francisco García Carballeira e Mª Elena Cerneira Santiago, que se incorpora este ano por vez primeira ao panel de cata.}

^{Na xornada inicial do concurso realizaron unha primeira selección de cañas de cara á gran final desta tarde, para a que se clasificaron oito licores brancos, cinco de herbas e seis tostados. De entre eles sairán os gañadores do certame en base a unha serie de criterios que os catadores teñen en conta á hora de valorar as augardentes: o visual, o olfactivo e o gustativo.}

^{Na fase visual avalíase a transparencia, no caso da caña branca, e a cor se son de herbas ou tostadas, pero tamén a ausencia de impurezas e de turbidez. No referido ao olfacto, cada variedade debe presentar uns aromas característicos. E, por último, avalíase o sabor: máis puro na caña branca, fresco na de herbas e doce na tostada. Neste apartado tamén adquire relevancia a graduación alcólica.}

^{Os produtores das mellores augardentes daranse a coñecer mañá sábado durante os actos da Festa da Anguía e Mostra da Caña do País e repartiranse 1.100 euros premios: 500 euros para a mellor caña branca, e 300 para os licores de herbas e tostado mellor valorados. Os segundos clasificados nas tres modalidades recibirán un trofeo e un diploma conmemorativo.}