- Instaláronse unha pantalla interactiva, unha cámara robotizada, micrófonos e altofalantes

- O centro, que se atopa no Auditorio Municipal, imparte cursos e obradoiros de alfabetización dixital e novas tecnoloxías

^{Valga, 28 de agosto de 2024.}

^{A Aula CeMIT continúa a incorporar equipamentos tecnolóxicos para adaptala ás novas necesidades que van xurdindo e, sobre todo, ás novas capacitacións que se ofrecen a través das diferentes actividades, cursos e obradoiros que se imparten a distintos sectores poboacionais.}

^{Nos últimos días, técnicos da Axencia Galega para a Modernización Tecnolóxica (Amtega) instalaron unha pantalla interactiva táctil na que se pode proxectar a pantalla do ordenador do docente para facilitar a aprendizaxe por parte do alumnado. Ademais, funciona como pizarra, sendo posible escribir ou marcar sobre a imaxe que se está a proxectar.}

^{Tamén pode empregarse á marxe do ordenador, como pizarra autónoma, ou como xestor de arquivos, introducindo unha memoria USB para reproducir directamente imaxes ou vídeos. Inclúe, así mesmo, outra serie de aplicacións para realizar videoconferencias, navegador, calculadora, etc.}

^{A pantalla acompáñase doutro material complementario, coma un teclado inalámbrico, mando a distancia, dous lapiseiros táctiles e un kit de limpeza.}

^{A aula tamén foi dotada dunha cámara web robotizada para o seu uso en videoconferencias, un altofalante intelixente, un micrófono de teito, outro de solapa e un terceiro para o docente.}

^{A Aula CeMIT forma parte da rede de centros para a modernización e inclusión tecnolóxica da Xunta, que ten como obxectivo a vertebración territorial e social de Galicia, en especial naqueles lugares nos que a fenda dixital é máis notoria, impulsando, potenciando e difundindo coñecementos sobre as novas tecnoloxías mediante actividades formativas no campo da alfabetización dixital e o emprendemento.}