Os traballos céntranse estes días na fachada do inmoble, sometida a limpeza, accións de reparación e pintado

O alcalde e a directora do Obradoiro comprobaron o avance das actuacións de destacaron “o bo facer do alumnado”

^{Valga, 27 de agosto de 2025.}

^{Os aprendices que participan no Obradoiro de Emprego xuvenil dos concellos de Valga, Moraña e Portas están de novo realizando obras na nosa localidade e, nas últimas xornadas, deron un pulo ao acondicionamento do edificio da Escola Taller, un proxecto  no que veñen traballando dende o comezo da súa formación.}

^{En concreto, son os oito alumnos de albanelería os que están a realizar esta actuación, que agora se atopa nunha fase exterior para o arranxo da fachada. Isto inclúe a retirada de canlóns baixantes deterioradas, tratamento de paredes e enfoscado das mesmas para reparar fendas, limpeza con máquina hidrolimpadora e posterior pintado.}

^{Ademais, no interior do inmoble, situado no lugar do Forno, continúan os traballos de colocación do novo piso en corredores e almacéns, así coma o pintado de diferentes espazos.}

^{O alcalde, José María Bello Maneiro, realizou unha visita á obra, acompañado pola directora do Obradoiro, Mª Carmen Vidal, que destacou o avance experimentado nesta obra grazas “ao bo facer do alumnado”.}

^{O obxectivo deste programa formativo, é o que os participantes adquiran coñecementos teóricos e experiencia práctica nos dous oficios que se imparten (albanelería e traballos forestais), para así mellorar a súa empregabilidade.}

^{O Obradoiro de Emprego Xóvenes, que está a formar a un total de dezaseis persoas, é cofinanciado polo Fondo Social Europeo Plus no marco do programa FSE + Galicia 2021-2027.}