- O alcalde mantivo unha xuntanza co presidente da entidade provincial, na que lle fixo entrega deste informe

- O municipio conta con puntos positivos en canto á enerxía eólica, a biomasa, o biogás e a xeotermia

^{Valga, 24 de xullo de 2025.}

^{O alcalde, José María Bello Maneiro, asistiu a unha xuntanza na Deputación na que o presidente, Luis López, e o deputado de Fondos Europeos, Javier Tourís, lle fixeron entrega do estudo de potencial enerxético do municipio desenvolvido polo organismo provincial a través da Oficina de Transformación Comunitaria +Renovables. Segundo este informe, Valga presenta un potencial de xeración de enerxía renovable alto e conta con condicións favorables para o desenvolvemento dunha comunidade enerxética local.}

^{O estudo detalla que a implantación dunha infraestrutura de autoconsumo colectivo fotovoltaico como a formulada polo Concello de Valga, aproveitando os edificios municipais, permitiría reducir ata 53T/ano de emisións de dióxido de carbono, mellorar a calidade do aire e tamén impulsar a xeración de emprego local. Pero, ademais, o informe tamén conclúe que a localidade ten potencial solar fotovoltaico como para producir enerxía para superar o consumo eléctrico actual.}

^{Ademais, o estudo elaborado por +Renovables tamén valora outras fontes de produción de enerxía renovables como a eólica, destacando que a localidade ten zonas con capacidade para a miniéolica ou a gran eólica. No que respecta ás explotacións forestais, poderíase extraer un equivalente térmico para a produción de biomasa que podería cubrir un 11% da demanda térmica das vivendas e cuxa viabilidade depende da escala e dunha xestión forestal sostible. En canto ao biogás, con todos os residuos xerados nas explotacións gandeiras de Valga poderíase valorar pequenas instalacións de autoconsumo e, no que respecta á xeotermia, o concello ten tamén oportunidades para proxectos a pequena escala.}

^{A través de +Renovables a Deputación quere impulsar a creación e o desenvolvemento de comunidades enerxéticas nos municipios da provincia, alcanzando tanto núcleos urbanos, como rurais e industriais. Ademais, a oficina provincial tamén está a espallar medidas e iniciativas para impulsar a eficiencia enerxética e loitar contra o cambio climático.}