- Colocáronse doce sinais coa iconografía identificativa desta ruta de peregrinación, que inclúe unha frecha bicolor (azul e amarela)

- As capelas da Saúde e dos Martores, as fervenzas ou o petróglifo Pedra da Serpe son algúns dos lugares de interese polos que discorre o itinerario

^{Valga,  25 de xullo de 2025.}

^{O Concello de Valga, xunto coa Asociación Vía Mariana Luso-Galaica, continúa desenvolvendo accións de difusión desta ruta de peregrinación e, recentemente, procedeu á sinalización do tramo que discorre polo termo municipal valgués.}

^{A Vía Mariana, con orixe en Braga e final en Muxía, toca Valga na etapa número 12. Entra no concello procedente de Magán (Cuntis), pasando polos Martores. Cruza o río Valga e avanza en dirección a Laceiras, subindo ao Monte dos Salgueiros para continuar cara Pontecesures. Para guiar aos peregrinos por este percorrido, colocáronse un total de doce sinais de PVC con pau de madeira, coa iconografía da Vía Mariana que inclúe a frecha bicolor (azul e amarela) que a representa.}

^{Ademais deste itinerario principal, a Vía Mariana ao seu paso por Valga conta cunha variante que discorre tamén por Casal de Eirigo, Parafita e Raxoi, dende onde se dirixe cara Os Martores para enlazar co trazado oficial. En total, uns dez quilómetros de percorrido polo concello, sendo, ademais, o albergue do Pino un dos sinalados como lugar de descanso.}

^{Os peregrinos que completan esta etapa teñen a oportunidade de coñecer varios lugares de especial valor patrimonial, natural e cultural. Entre eles, a Capela da Virxe da Saúde, erixida no lugar no que se librou a Batalla de Casal de Eirigo no ano 1809; a Capela dos Martores, que algúns autores sinalan como punto de enterramento de Prisciliano; as fervenzas de Parafita e Raxoi; ou o petróglifo Pedra da Serpe, que data da Idade do Bronce.}