A- folla de inscrición, xunto coa documentación precisa, debe entregarse nas oficinas municipais
- A escola ofrece a actividades formativas para todas as idades, dende bebés a maiores
Valga, 18 de xuño de 2025.
A Escola Municipal de Música ten aberto, ata o día 6 de xullo, o prazo de matriculación de alumnos para o curso 2025/2026.
A folla de inscrición debe entregarse nas oficinas municipais debidamente cuberta e xunto á seguinte documentación:
- Xustificante do ingreso da taxa de matrícula na conta bancaria da Escola de Música
- Impreso de domiciliación bancaria
- 2 fotos tamaño carné
- Fotocopia do DNI do alumno ou Libro de Familia
- Autorización para a toma e publicación de imaxes
- Solicitude de bonificación, de ser o caso
A Escola admite alumnos de todas as idades. De 0 a 3 anos trabállanse as capacidades expresivas, psicomotrices e musicais. Na etapa de 3 a 7 anos, os alumnos xa poden bailar, cantar e tocar, e a partir dos 8 anos a formación inclúe o ritmo musical, entoación e teoría en Linguaxe Musical, ao tempo que se aprende a tocar un instrumento para, máis tarde, pasar a formar parte dalgunha das agrupacións, como a Banda ou a Orquestra. Outras das actividades que desenvolve a Escola Municipal son música con maiores, concertos didácticos durante todo o curso e saídas culturais.
As materias que poden cursarse en Grao Inicial son Música para bebés (de 0 a 3 anos), Música e Movemento (grupos de 3 a 8 anos), Linguaxe Musical (maiores de 8 anos), Musicoterapia e preparación de acceso a Grao Profesional. Nesta etapa, os alumnos tamén poden formar parte das seguintes agrupacións: Coro e Banda Peque, Big Band Peque, Combo de Maiores, Agrupación folk, Danza / Ballet, Baile Moderno e Baile Folk.
En Grao Medio as materias específicas que teñen aberta a matrícula son Linguaxe Musical, Harmonía e análise musical, Piano complementario e Historia. Tamén se imparten, como materias optativas, Novas Tecnoloxías, Arranxos e Composición, Combo / Improvisación e Adestramento rítmico-auditivo. As agrupacións ás que pode accederse nesta etapa son Música de Cámara, Orquestra, Banda de Música, Coro Xove (a partir de 13 anos), Big-Band e Canto.
No tocante aos instrumentos, impártense clases de frauta, oboe, clarinete, saxofón, fagot, trompeta, trompa, trombón, bombardino, tuba, percusión, gaita, acordeón, guitarra, piano, violín, viola, violonchelo, contrabaixo, canto e outros a proposición dos alumnos.
A folla de matrícula para todas estas actividades pode descargarse a través da páxina web do Concello (https://www.valga.gal/atencion-cidada/impresos-solicitudes).
