- Tamén están xa trazados os camiños paralalos á vía que mellorarán as conexións e a accesibilidade na zona

- O investimento nesta actuación de reforzo da seguridade na contorna da vía férrea invístense preto de catro millóns de euros

^{Valga, 12 de maio de 2025.}

^{As obras de supresión de dous cruces ferroviarios na parroquia de Cordeiro experimentaron un notable avance nos últimos meses, de maneira que xa comeza a cobrar forma a ponte que permitirá cruzar a vía con seguridade á altura do lugar de Castiñeiras, garantindo a conectividade entre ambas marxes da liña do tren entre Vilagarcía de Arousa e Santiago.}

^{A primeira fase deste proxecto, froito dun convenio entre o Administrador de Infraestruturas Ferroviarias (ADIF) e o Concello, consistiu na execución de obras de drenaxe para garantir a continuidade das canles de auga existentes, e movementos de terra e recheos para a cimentación da ponte.}

^{Na actualidade estase a traballar nos estribos laterais e na colocación dos pilotes sobre os que se asentará a estrutura do paso superior. Terá 59 metros de lonxitude, un gálibo vertical de 7 metros e tres vans: un central de 21 metros e dous laterais de 19. Os dous carrís de circulación, un por cada sentido, serán de 3 metros de ancho e as beiravías de 0’50 metros. Adosadas a estas, senllas bandas de 1’80 metros nas que se instalarán un muro de protección, as beirarrúas, unha varanda e a valla antivandálica.}

^{A ponte substituirá ao paso a nivel existente á altura do cruce de Castiñeiras, que segue operativo durante a execución das obras e está dotado de pavimento de caucho, sinalización luminosa e semibarreiras automáticas. O outro paso a nivel que se eliminará tiña carácter peonil e atópase na zona de Carracido}

^{Continuación das estradas xunto á vía}

^{Outra parte das obras consiste na continuación das estradas paralelas á vía do tren na marxe esquerda en dirección a Santiago, para manter a permeabilidade nas comunicacións e mellorar a seguridade.}

^{Están proxectados dous tramos de vías entre os lugares de Laxes e Carracido e dende a praia fluvial de Vilarello ata Vilar. A lonxitude total será de 1’7 quilómetros. O trazado destes camiños xa está acondicionado, a expensas de aplicar, na fase final das obras, a capa de aglomerado.}

^{O investimento total nestas actuacións aproxímase aos catro millóns, dos que o Concello aporta máis de 219.000 euros.}