- Acompañouna na viaxe a Arxentina o director do Centro Superior de Música, Simón Ibáñez

- Entre o público que se deu cita no Teatro incluso había valgueses residentes no país austral

^{Valga, 14 de abril de 2025.}

^{Os músicos do Centro Superior de Música de Valga continúan a percorrer algúns dos escenarios máis relevantes a nivel internacional a través do Promotion Program, unha iniciativa coa que o CSM Galicia trata de achegar ao seu alumnado á realidade profesional, abríndolles a oportunidade de amosar o seu talento en recitais e concertos en teatros de prestixio mundial.}

^{O último caso foi o de Ariadna Landrove, que o pasado venres actuou como solista, tocando a frauta traveseira, no emblemático Teatro Colón de Mar del Plata (Arxentina). Acompañouna a Banda Sinfónica Municipal de Mar del Plata, baixo a dirección do maestro José María Ulla. A moza, natural de Ferrol, interpretou o concerto de Mozart para frauta en Sol Maior e, para pechar a velada, compartiu escenario coa saxo Natalia Rodríguez e co clarinetista Gonzalo Borgognoni para tocar “Nana”, de Manuel de Falla.}

^{O director do Centro Superior de Música, Simón Ibáñez, tamén se desprazou ao país sudamericano para asistir ao concerto e, entre o público, incluso había valgueses residentes en Arxentina que acudiron ao teatro ao ter coñecemento de que actuaba unha alumna do CSM.}

^{Aos seus 21 anos, Ariadna Landrove xa ten vivido outras experiencias internacionais no mundo da música. Por exemplo, no pasado mes de decembro viaxou a Viena para tocar coa Filasteen Young Musicians Orchestra, unha agrupación xuvenil apadriñada pola Fundación Baremboin-Said. A nivel nacional, ten actuado con orquestras coma Madrid Sinfónica Décimo Arte ou a malagueña Sinfónica Orbis.}

^{Os seus inicios no mundo da música remóntanse a cando era tan só un nena, con cinco anos, tocando a gaita no Padroado de Cultura de Narón. Pouco despois, cando se incorporou ao Conservatorio de Ferrol, cambiou de instrumento e elixiu a frauta, coa que está a sobresaír entre os músicos da súa xeración, ao tempo que completa os seus estudos do Grao Superior de Música no CSM.}