- A festa celebrarase o domingo 18 de maio no recinto do colexio Ferro Couselo

- Haberá autobuses gratuítos, concerto da Banda Municipal, xantar e sorteo de agasallos

^{Valga, 11 de abril de 2025.}

^{O domingo 18 de maio é a data na que se celebrará unha nova edición do Encontro da Terceira Idade, a número vinte e sete, unha homenaxe á poboación máis veterana de Valga, que poderá participar nunha xornada de confraternidade entre veciños e con diversas actividades lúdicas.}

^{Neste festexo poden participar os veciños que teñan cumpridos 65 anos ou que os cumpran durante este ano 2025. Nestes días estáselles a informar por carta sobre os detalles da celebración, que terá lugar no recinto do colexio Xesús Ferro Couselo. Para asistir haberá autobuses gratuítos, con parada nos lugares habituais.}

^{As inscricións poden realizarse presencialmente no Concello, a través dos números de teléfono 986 55 94 56 (Concello) e 986 55 67 69 (Auditorio) ou enviando un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. O prazo para anotarse estará aberto ata o día 2 de maio.}

^{O programa de actividades previsto para ese domingo dará comezo ás 13:00 horas coa actuación da Banda de Música Municipal de Valga e, a continuación, terá lugar un xantar popular. No transcurso da xornada haberá sorteo de agasallos doados por casas comerciais e entidades de Valga e da contorna e tamén se entregará un recoñecemento ao home e a muller de maior idade que participen no encontro, así coma aos asistentes que estean de aniversario.}