- Sergio Manteiga, que estuda a especialidade de trombón, ofreceu dous concertos en Austria a través do Promotion Program

- “Moi poucos músicos teñen a oportunidade de actuar como solistas neste recinto”, destaca o director do CSM, Simón Ibáñez

^{Valga, 2 de abril de 2025.}

^{O Centro Superior de Música de Valga (CSM Galicia) continúa a acadar fitos na súa aínda curta pero transcendente traxectoria. Músicos formados no conservatorio con sede no Auditorio Municipal están a alcanzar éxitos e obxectivos que os levan a sobresaír en diferentes lugares do mundo.}

^{Un novo exemplo é Sergio Manteiga García, un mozo de Ordes que con tan só 19 anos de idade vén e actuar como solista na Musikverein de Viena, considerada coma unha das salas de concertos máis importantes a nivel internacional, pola que pasan as principais orquestras sinfónicas do mundo e na que, por exemplo, se celebran os concertos de Aninovo da Filharmónica de Viena.}

^{Esta oportunidade xurdiu a través do Promotion Program, unha iniciativa coa que o CSM  trata de enfocar ao seu alumnado cara a vida profesional xa dende os comezos da súa formación, abríndolles a oportunidade de participar en recitais e concertos en teatros de prestixio internacional.}

^{“Foi un concerto especial, porque é unha sala na que non todo o mundo pode actuar e, moito menos, como solista”, sinala Sergio, que é membro da Orquestra Sinfónica de Euskadi, na posición de segundo trombón. Estivo acompañado en Viena por varios familiares, entre eles seus pais, e tamén polo director do CSM, Simón Ibáñez, que destaca o excepcional do logro conseguido polo seu alumno: “Moi poucos músicos teñen a posibilidade de actuar como solistas no Musikverein de Viena. Sería como en fútbol xogar a Champions League”.}

^{O concerto protagonizado por Sergio Manteiga tivo lugar na sala principal do Musikverein, a Sala Dourada, onde interpretou o Concerto para trombón de Nino Rota co acompañamento da Orquestra Filharmónica de Sofía (Bulgaria). Ademais, durante a súa estadía en Austria, ofreceu un segundo concerto na Konzerthaus da cidade de Klagenfurt.}

^{A relación de Sergio coa música foi moi precoz, dende cativo. “Meus pais anotáronme en moitas actividades extraescolares e unha delas era música. Comecei cun veciño de Ordes, que é clarinetista na Banda de Música da Policía, en Madrid, e por iso empecei tocando o clarinete. Pero cando ingresei no Conservatorio en Santiago non había prazas de clarinete e por iso cambiei ao trombón”. Na primeira metade do pasado ano estivo estudando en Amsterdam pero cando gañou a oposición para a Orquestra de Euskadi resultáballe incompatible seguir no estranxeiro, por iso elixiu o CSM Galicia para continuar os seus estudos do Grao Superior de Música.}