- O alcalde sinalou que os avances cara a igualdade acadados nos últimos tempos “hoxe poden parecer pouca cousa, pero no seu día foron grandes pasos”

- As protagonistas do recoñecemento asinaron no Libro da Muller e recibiron un diploma e varios agasallos

Valga, 14 de marzo de 2025.
O Concello celebrou esta tarde o acto central conmemorativo do Día Internacional da Muller cunha homenaxe a unha vintena de valguesas destacadas no mundo do deporte, tanto polos seus logros (que levan o nome de Valga por Galicia, España e o mundo) como pola súa condición de pioneiras rompendo barreiras en prol da igualdade ou participando en deportes nos que a presenza da muller aínda non está normalizada.

Porque no deporte, coma noutros moitos ámbitos, as mulleres tiveron que loitar contra a discriminación, marxinadas e excluídas de disciplinas consideradas só para homes, vendo como os seus éxitos eran minusvalorados e tendo que escoitar vexacións e insultos sexistas. En Valga viviuse unha destas batallas, cando tres xogadoras de fútbol de categoría cadete e o Furia A.C. tiveron que enfrontarse á Federación Galega, que lles impedía disputar competicións oficiais cun equipo mixto. Tivo que pronunciarse o Comité Galego de Disciplina Deportiva, que en abril de 1998, ditou unha resolución histórica na que se recoñecía o dereito destas tres xogadoras a non ser discriminadas por razón de sexo e a xogar ao fútbol en igualdade de condicións que os seus compañeiros.

Pero a pesar dos avances, a igualdade real aínda non se acadou. Xogadoras, atletas e árbitras seguen a escoitar expresións despectivas relacionadas coa súa condición de mulleres; a igualdade salarial está moi lonxe; nunha das últimas Supercopas de España as futbolistas tiveron que poñerse elas mesmas as medallas ante a ausencia de autoridades; e que dicir do acontecido trala final do Mundial de fútbol no que a Selección Española feminina se proclamou campioa.

A conclusión é que queda moito por facer e o acto celebrado hoxe polo Concello quere contribuír a novos avances.

As homenaxeadas foron:
• Diana Rey Martínez (fútbol)
• Rosa Pardal Aragunde (fútbol)
• Laura Abalo Bustelo (fútbol)
• Melanie García González (fútbol)
• María Arufe Fernández (fútbol)
• Zoe Santos Aboy (baile e ximnasia rítmica)
• Elia Loureiro Varela (salvamento e socorrismo)
• Marta Guimarey Gómez (piragüismo)
• Valeria Ordóñez Bascoy (piragüismo)
• Paola Cerneira Oliveira (piragüismo)
• Inés Villaverde Ferro (piragüismo)
• Zaira Caeiro Cerneira (piragüismo)
• Nerea Novo Romero (piragüismo)
• Aroa Castromán Figueira (motocross)
• Alejandra Trenco Paz (karate)
• Andrea Gestoso Castroagudín (karate)
• Lorena Álvarez Fernández (karate)
• Ana Otero Losada (karate)
• Olalla Fabeiro Iglesias (rally)

Todas elas asinaron no Libro das Mulleres e recibiron un diploma e varios agasallos de mans do alcalde, José María Bello Maneiro, e das concelleiras Carmen Gómez, Begoña Piñeiro e Malena Isorna.

O rexedor lembrou que as homenaxeadas son só unha representación de outras moitas deportistas valguesas e destacou que os avances logrados “hoxe poden parecer pouca cousa pero no seu día foron grandes pasos cara a igualdade”:

A cantante Loli Conde, alumna da Escola de Música de Valga, acompañada pola mestra Merram Laginestra ao piano, actuou durante a gala de homenaxe, interpretando os temas “In a sentimental mood”, de Duk Ellington, e “Vanishing”, de Mariah Carey e Ben Margulies.