- A mostra reúne dezanove cadros nos que se representan distintas variedades da “flor de Galicia”

- Dúas das obras acaban de ser seleccionadas para o material divulgativo do Congreso Internacional de Tokio

^{Valga, 5 de marzo de 2025.}

^{Trala mostra da pasada fin de semana, na que participaron trinta e cinco expositores, a camelia continúa sendo protagonista durante todo o mes de marzo no Auditorio, da man de Rosa Crespo na súa faceta de pintora.}

^{A mostra “A pintura é unha delicia” reúne unha colección de dezanove cadros nos que se  homenaxea á chamada “flor de Galicia”. Trátase de óleos sobre lenzo nos que a artista reproduce algunhas das variedades que ela mesma cultiva na súa plantación de Valga. Entre as máis salientables, por exemplo, a denominada Crisanta “que é orixinaria de Vietnam e está moi de moda porque, entre as amarelas, é a que ten unha cor máis viva”, explica a artista.}

^{Tamén destacan na exposición as obras tituladas “Agarimo” e “Ledicia”, que veñen de ser seleccionadas para o deseño das láminas que se repartirán no Congreso Internacional de Camelia de Tokio (Xapón). Ademais, a Deputación Provincial e a Sociedade Española da Camelia tamén as repartiron na 60 edición da Mostra celebrada recentemente en Pontevedra, e na que Rosa Crespo resultou gañadora na modalidade de camelias híbridas coa variedade que leva o nome da súa neta, Miriam Escofet, e que ela mesma rexistrou a nivel internacional.}

^{Rosa, que reside en Valga dende fai máis de 30 anos, ten vocación de pintora dende cativa. Os seus estudos de conservadora e restauradora de bens culturais permitíronlle perfeccionar e diversificar as técnicas que aplica nas súas obras, que adoitan ter na natureza un dos seus temas máis recorrentes. Sen dúbida, as camelias son a súa principal fonte de inspiración e teñen un papel preponderante na meirande parte dos seus cadros, ben sexa por si soas ou como parte de bodegóns.}

^{Así pode comprobarse na mostra que permanecerá no Auditorio ata finais de marzo.}