- O grupo de adultos xa en ensaia en Casaldeirigo “A memoria da terra” e o vindeiro domingo estrea “Pronóstico reservado”

- Os máis pequenos porán en escena unha versión do conto de Cinsenta

^{Valga, 19 de maio de 2018.}

^{A Escola Municipal de Teatro prepárase para un intenso peche de curso con tres representacións nunha mesma fin de semana, a vindeira, coas que amosarán ao público o resultado do traballo realizado dende o mes de outubro con Manuel Solla Barragáns como profesor. “Foi un curso bo e fluído, cando noutros anos había máis dificultades coa dispoñibilidade de datas e horarios. Para o alumnado foi proveitoso e eu tamén estou satisfeito”, di o mestre. “Agora queda o remate, que as obras saian ben e que lles gusten á xente”.}

^{O grupo de adultos ten dobre traballo. O vindeiro sábado estarán en Casaldeirigo liderando a representación de “A memoria da terra”, obra coa que Iria Esperón Abril gañou o premio de teatro A Guerra da Independencia en Valga. Hoxe os actores das Escola de Teatro e os veciños que os acompañan neste espectáculo teñen por diante unha xornada intensiva de ensaios no adro da Capela da Saúde. Durante a próxima semana están previstos aínda outras dúas probas para que na tarde do día 26, no marco da Recreación da Batalla de Casaldeirigo, todo saia segundo o guión.}

^{O domingo 27 tanto maiores como nenos regresan a escena no Auditorio Municipal. Representarán, a partir das 19 horas e con entrada de balde para o público, “Non queremos perdices” o grupo infantil e “Pronóstico reservado” os adultos. Esta é unha comedia un pouco negra que transcorre nunha habitación de hospital, xunto á cama dunha persoa en coma sobre a que irá descubríndoseunha parte escura. “É unha obra que trata de sorprender ao público”, comenta Manuel Solla.}

^{No que respecta aos rapaces, protagonizarán unha versión do conto de Cinsenta centrada en valores como a igualdade de xénero. “É unha obra con mensaxe e que axuda a traballar a igualdade dende a infancia”, explica Solla Barragáns. O título, “Non queremos perdices”, alude ao tradicional final dos contos clásicos “Foron felices e comeron perdices”.}

^{A representación será todo un reto para os nenos. “Algúns farán varios personaxes, hai momentos de baile e teñen que estar moi concentrados”, indica o mestre. Iso é o que están a traballar nas últimas clases da tempada, repasar o texto e saber o que dicir e o que facer en cada momento da obra.}