- “Que a nosa primeira producción estea a ter tan boa acollida para nós xa é un recoñecemento”

- O día 15 de marzo coñeceranse o gañadores da XXIII edición dos premios da Academia Galega do Audiovisual

^{Valga, 12 de febreiro de 2025.}

^{Valga terá protagonismo na gala de entrega dos premios Mestre Mateo, cos que a Academia Galega do Audiovisual recoñece ás mellores producións do ano. Será a través da curtametraxe de ficción “Nai”, a ópera prima dos valgueses Brais do Rei (Brais Villar Rey, de Magariños) e Tito Refoxo (Tito Castaño Refojo, de Barcia), que ademais é o director da peza. Brais, pola súa parte, participou tamén na banda sonora, como membro do grupo Moura.}

^{“Nai” é finalista na categoría de Mellor Curtametraxe, xunto a outras tres producións, e os gañadores desta XXIII edición dos premios daranse a coñecer o vindeiro 15 de marzo. Pero, independentemente do resultado, “nós coa nominación xa gañamos”, confesa Brais. “Que o primeiro traballo que facemos teña tan boa acollida e, sobre todo, que o público empatice coa nosa historia xa é un recoñecemento de que o traballo foi bo”, engade satisfeito con todo o que están a vivir dende que, fai arredor de ano e medio, puxeron en marcha este proxecto.}

^{Os dous estaban xa relacionados co mundo do audiovisual. Tito Refoxo como actor de series como Rapa, Clanes e outras moitas producións; e Brais a través da música e das artes dramáticas. “Sempre nos gustou moito o cine e o audiovisual en xeral e decidimos dar o salto cunha produción que fora cen por cen nosa. Realmente foi todo moi rápido: escribimos o guión, contactamos cos mellores profesionais dos que puidemos botar man e para adiante”.}

^{O resultado foi “Nai”, unha curta que trata sobre a  non asunción da perda e como isto afecta a unha familia do rural de Galicia. A rodaxe desenvolveuse no concello de Rois, nos lugares da Peruca e no Pazo de Antequeira.}

^{A produción leva meses presentándose en diferentes festivais e “a resposta, en todos os sitios que estivemos, foi  moi boa. Déronnos os parabéns por facer un primeiro traballo deste nivel, que moitas veces é complicado pola falta de recursos ou de experiencia. Para nós foi todo bastante sinxelo e incluso divertido e iso animounos a crear a nosa propia produtora”.}