- Os traballos están sendo executados pola empresa Elecnor

- Un convenio de colaboración entre o Concello e a Consellería de Industria suporá un investimento de 735.000 euros no vindeiro ano

^{Valga, 31 de decembro de 2024.}

^{As obras de construción da nova subestación eléctrica de Valga, que se desenvolven na Medela (Xanza), continúan segundo o previsto, co obxectivo de mellorar a calidade da subministración eléctrica no municipio e, especialmente, para garantir potencia suficiente para a actividade industrial que actualmente se desenvolve en Valga e futuras empresas que poidan asentarse.}

^{Porque esta subestación ten como obxectivo dotar de subministración ao futuro polígono industrial que se proxecta no propio lugar da Medela, pero tamén se conectará a esta nova liña a empresa Extrugasa, que precisa un aumento de potencia para a súa planta de Campaña. Por iso, no seu día e para impulsar este proxecto, se asinou un convenio de colaboración entre o Concello, Extrugasa e Fenosa que, unha vez rematadas as obras, se fará cargo da explotación da subestación transformadora.}

^{Esta infraestrutura, denominada STR Medela, alimentarase mediante a construción dunha nova liña eléctrica de aproximadamente 50 metros de lonxitude que conectará  a nova subestación coa liña de interconexión das subestacións de Padrón e Tivo (Caldas).}

^{Para a finalización das obras, o Concello e a Consellería de Industria asinaron un convenio de colaboración que suporá o investimento de 735.147 euros no vindeiro ano. A subvención total concedida pola Xunta de Galicia ascende a un millón de euros.}

^{Está previsto que os traballos, que está executando a empresa Elecnor, rematen a mediados de 2025.}