- O documento, que facilitará a consecución de máis fondos e subvencións, contempla o desenvolvemento dunha trintena de actuacións prioritarias

- Participaron na presentación os alcaldes de Catoira, Pontecesures, Valga e Vilanova de Arousa, así como a deputada provincial Belén Cachafeiro

^{Valga, 18 de decembro de 2024.}

^{Os concellos que integran o xeodestino “Mar de Santiago”, entre os que se atopa Valga, contan xa cunha folla de ruta para o desenvolvemento urbano e o progreso socioeconómico nos próximos anos: a Axenda Urbana 2030, que se presentou esta mañá no Auditorio Municipal nun acto que contou coa participación do alcalde, José María Bello Maneiro. Acompañárono os rexedores de Catoira, Vilanova e Pontecesures e tamén Belén Cachafeiro, deputada responsable da área de fondos europeos, innovación e axenda dixital da Deputación de Pontevedra.}

^{A axenda urbana é un documento que ten como obxectivo deseñar e executar unha serie de actuacións e proxectos para impulsar a transformación do territorio de “Mar de Santiago” en termos de sustentabilidade, cohesión social, equilibrio territorial e mellora da calidade de vida dos habitantes dos catro municipios.}

^{O documento establece unha serie de liñas de acción prioritarias, coherentes e complementarias entre si, garantindo que tanto estas como a axenda no seu conxunto estean aliñadas cos Obxectivos de Desenvolvemento Sostible da ONU e cos obxectivos da Axenda Urbana Española. “Estas liñas estratéxicas establecéronse despois de realizar diversas consultas aos diferentes actores sociais dos concellos que integran o xeodestino, aos que solicitou a aportación de ideas garantindo unha escoita activa. A partir dese momento, elaboramos un plan de acción baseado na tripla dimensión da sustentabilidade: a ambiental, a económica e a social”, detallou Rubén Pérez, responsable da consultoría Dos Espacios, que se encargou da elaboración da Axenda.}

^{Esta consta de 28 actuacións que xiran arredor de catro grandes liñas estratéxicas identificadas como prioritarias para o desenvolvemento sostible dos catro municipios. Por unha parte, a resiliencia verde, que se enfoca en incorporar prácticas e políticas de sustentabilidade ambiental na planificación e xestión territorial, promovendo o uso eficiente dos recursos, a mitigación ou adaptación ao cambio climático ou a posta en valor dos recursos naturais e culturais.}

^{Facer dos asentamentos urbanos e rurais un entorno máis habitable a través da mellora dos espazos públicos, os equipamentos municipais, as infraestruturas e as edificacións, así como a mobilidade ou a xestión do ciclo hídrico é a segunda liña. Nela búscase prestar uns servizos públicos de calidade e similares entre o medio urbano e o rural, promovendo a equidade territorial.}

^{A terceira liña, baixo o nome de “Equidade e oportunidades”, ten como premisa facer de “Mar de Santiago” un territorio que ofreza oportunidades para todos e loite contra a discriminación e a exclusión social.}

^{Por último, o impulso de actuacións e medidas que doten á asociación “Mar de Santiago” das ferramentas necesarias para realizar un traballo coordinado e coherente entre os catro municipios, avanzando e afondando na transformación dixital do destino, tanto no seu funcionamento interno como de cara á cidadanía.}

^{Durante o acto de presentación, os alcaldes sinalaron que esta Axenda Urbana 2030 une aos catro concellos “nun obxectivo común: mellorar a vida dos veciños e cambiar a fisionomía das nosas vilas, tendo claro que queremos facer e como queremos mellorar”. Referíronse a este documento como “necesario e imprescindible” para optar á consecución de máis recursos, algo que resultaría “imposible para calquera dos catro concellos por si sós”.}

^{A deputada Belén Cachafeiro, pola súa banda, felicitou aos rexedores por “unir forzas para poder acceder a fondos que redunden en beneficio dos cidadáns” e concluíu que se abre “un escenario de retos e oportunidades” para as catro localidades.}