- A Asociación Compostelá de Amigos do Ferrocarril, promotora da mostra, apoia ao Concello na reivindicación dun apeadoiro para o municipio

- Paneis informativos, fotografías, publicacións e obxectos relacionados co tren forman o contido da exposición

^{Valga, 10 de decembro de 2024.}

^{A exposición conmemorativa do 150 aniversario da entrada en servizo da primeira liña de tren galega, entre Cornes e Carril foi inaugurada esta mañá no Auditorio Municipal polo alcalde, José María Bello Maneiro, e o presidente da Asociación Compostelá de Amigos do Ferrocarril (ACAF), Carlos Abellán, que ademais é comisario da mostra.}

^{Esta inclúe unha serie de paneis informativos sobre a historia daquel camiño de ferro que pretendía “achegar Santiago ao mar” e que “non foi promovida por grandes prestamistas, senón por personas que crenon na súa terra, coma o xeógrafo Domingo Fontán, que fixo os primeiros planos, o pai de Valle-Inclán ou Eugenio Montero Ríos”, sinalou Abellán. “Crían no tren como algo novidoso e rompedor e así foi, xa que se hai unha palabra que defina a este medio de transporte é a innovación”, engadiu. Esta evolución constante fixo posible que en século e medio se pasara do vapor á alta velocidade.}

^{Os paneis recollen información e fotografías sobre a liña Cornes-Carril e os seus avatares: os distintos tipos de trens e locomotoras que circularon por ela, entre os máis famosos o “Tren de Varela” ou a Sarita; as estacións primixenias e as actuais; ou algúns dos accidentes máis tráxicos, coma o acontecido en 1952 en Padrón, onde a colisión de varios vagóns cargados de combustible cun tren de viaxeiros causou 23 falecidos. A exposición tamén inclúe publicacións e obxectos históricos relacionados co sector ferroviario.}

^{Durante o acto inaugural, que foi amenizado por Yassmin Noel e Adriadna Landrove do Centro Superior de Música, o alcalde lembrou que “cando esta liña de tren se puxo en funcionamento, Valga tiña unha parada”, a actual estación de Pontecesures. “Esperamos que máis cedo que tarde poidamos subir de novo a tren en Valga. Eu sempre digo que o tren é un autobús pola vía, un medio de transporte menos contaminante, que reduce os problemas de tráfico, a axuda a fixar poboación no rural e que sería importantísimo para a mobilidade de estudantes, traballadores e outros sectores da poboación”. Por iso, lembrou, o Concello está a xestionar ante o ADIF a posibilidade de establecer un apeadoiro no municipio, unha reivindicación que é apoiada pola Asociación Compostelá de Amigos do Ferrocarril.}

^{Fai anos, coa construción da nova vía para alta velocidade “a asociación e un grupo de once alcaldes, entre eles o de Valga, xuntámonos para loitar polo mantemento desta vía, dada a súa importancia social, económica e tamén cultural. Conseguímolo, pero quedaron varios temas pendentes polos que temos que seguir loitando e un deles e a creación dunha liña de cercanías con parada en Valga”, remarcou Carlos Abellán.}