- Celebrarase o día 16 de decembro entre as 10:00 e as 14:00 horas
- A xornada á organizada polo colectivo Fadeal, coa colaboración do Concello e da Deputación
Valga, 9 de decembro de 2024.
A Federación de asociacións de familiares de persoas con alzheimer e outras demencias (Fadeal), coa colaboración do Concello de Valga e o financiamento da Deputación de Pontevedra, impartirá o vindeiro 16 de decembro unha xornada formativa gratuíta enmarcada no proxecto “Alzheimer de Preto”.
A actividade desenvolverase entre as 10:00 e as 14:00 horas no Auditorio Municipal e diríxese principalmente a coidadores de persoas con demencias neurodexenerativas, pero tamén a persoas diagnosticadas en fase moi temperá así como a calquera outro interesado nesta temática. A sesión será impartida por profesionais da Asociación de familiares de enfermos de alzheimer do Salnés (Afasal), en concreto pola psicóloga Carla Sofía Gonçalves e a traballadora social Alba Basallo.
As demencias teñen unha alta prevalencia (estímase que afectan ao 31’25% das persoas que superan os 85 anos), especialmente en Galicia, cunha poboación moi envellecida. Ademais, no contexto rural hai que engadir unha escaseza de servizos e ausencia de intervencións. Esta realidade non só afecta ás persoas que padecen a enfermidade, senón tamén a todo o núcleo familiar que os rodea.
Por este motivo, realízase esta formación gratuíta co obxectivo de formar, orientar e axudar a persoas que se atopan nesta situación, achegando coñecementos e recursos para poder afrontar mellor a enfermidade e contribuír a mellorar a calidade de vida tanto do doente coma da súa familia.
