- A asociación Amigos do Belén instalou un nacemento na entrada principal do centro sanitario
- Algunhas escenas da montaxe contan con movemento e actívanse, a través dun sensor, cando algunha persoa se aproxima
Valga, 9 de decembro de 2024.
Un pequeno Belén de Valga adorna dende este mediodía a entrada principal do Hospital Clínico de Santiago, que neste Nadal solicitou a colaboración da asociación Amigos do Belén para adornar as instalacións sanitarias e alegrar as datas de Nadal tanto aos pacientes que se atopan ingresados coma os que teñen que acudir de xeito puntual a realizar algunha proba ou a consulta.
A sona coa que conta o Belén Artesanal en Movemento, que está declarado de Interese Turístico de Galicia, fixo que “se puxeran en contacto con nós dende a área de Pediatría do Hospital. Nun primeiro momento solicitáronnos que lles fixeramos unha pequena montaxe para os nenos, pero despois pensárono mellor e preferiron colocar un belén algo máis grande no hall principal do Hospital, onde se atopan outros adornos de Nadal coma a árbore”, explica a presidenta de Amigos do Belén, Mari Carmen Castiñeiras.
A instalación realizouse durante a mañá de hoxe. Trátase dunha montaxe de 5 metros de longo por 1’5 de ancho que ten como escena central o nacemento do Neno Xesús no pesebre e a adoración dos Reis Magos. Ademais inclúe varias construcións como vivendas e un Centro de Saúde no que o persoal sanitario pasa consulta e un enfermeiro pon unha inxección a un paciente. Varias figuras contan con movemento, activándose a través dun sensor cando a xente se aproxima. Outro dos detalles que máis chamou a atención ás primeiras persoas que o viron foi o tradicional “caganet”, xa que se trata dunha representación do expresidente catalán Carles Puigdemont.
Isabel Campos, directora de Enfermería do CHUS; Juan Manuel Lorenzo González, subdirector de Humanización e Atención á Cidadanía; Jorge Aboal, director de Procesos de Soporte; Federico Martinón, xefe do servizo de Pediatría; e Maite Autrán e Belén Mosquera, de Obra Social Pediatría, achegáronse a agradecer aos membros de Amigos do Belén o traballo realizado e a súa disposición a colaborar. Algúns deles xa son coñecedores e asiduos visitantes do Belén Artesanal de Valga, de aí que pensaran nos seus artífices para adornar as instalacións hospitalarias.
No transcurso desta mañá, mentres se estaba a realizar a montaxe do Belén, a noticia correu polas diferentes estancias do Hospital e foron moitos os pacientes (algúns deles veciños de Valga) que se achegaron con gañas de ver o resultado final.
