- Escolares de Primaria realizaron tarefas como poñer a mesa, tender a roupa ou coidar aos nenos e recapacitaron sobre os roles de xénero que se manteñen nos seus fogares

- A actividade forma parte da programación educativa organizada polo Concello para conmemorar o 25-N

^{Valga, 4 de decembro de 2024.}

^{As actividades escolares de concienciación contra a violencia de xénero e a prol da igualdade fan esta semana parada no colexio Baño-Xanza, onde o alumnado de Educación Primaria participa dende hoxe nunha xincana con probas sobre corresponsabilidade no fogar.}

^{Esta iniciativa, incluída na programación conmemorativa do Día Internacional para a eliminación da violencia contra a muller, pretende que os rapaces recapaciten sobre como están repartidas determinadas tarefas nos seus propios fogares e se consideran que o xénero dos membros das súas familias inflúe nos traballos que realiza cada un.}

^{Deste xeito, foméntase entre as novas xeracións unha reflexión sobre algúns dos roles sexistas máis arraigados no ámbito doméstico e incídese na necesidade de avanzar cara un reparto igualitario das tarefas.}

^{Divididos en grupos mixtos, os alumnos participaron nunha serie de probas nas que tiveron que replicar algunhas das tarefas domésticas máis habituais: facer a cama, coidar aos fillos, tender a roupa e dobrala ou poñer a mesa, entre outras.}

^{Esta actividade xa se realizara fai uns días no colexio Xesús Ferro Couselo e é tan só unha das accións formativas e lúdicas dirixidas á poboación escolar que se están a desenvolver nos diferentes centros educativos valgueses, para implicar á mocidade na loita contra a violencia machista e contra todo tipo de manifestacións ou accións que contribúen á desigualdade de xénero. Tamén se programaron contacontos para os cativos de Educación Infantil e dos primeiros cursos de Primaria e charlas para o estudantado de Educación Secundaria.}