- O proceso de licitación concluíu coa adxudicación dos traballos á empresa Covsa

- O peche, que reforzará a seguridade na antiga mina, será de madeira de pino

^{Valga, 15 de novembro de 2024.}

^{As obras de instalación do peche perimetral na mina Porto Piñeiro darán comezo en datas próximas, toda vez que o proceso de contratación rematou coa adxudicación á empresa Construcións, Obras e Viais (Covsa).}

^{Dotar de seguridade á contorna da lagoa é o obxectivo deste proxecto, valorado en 366.188’60 euros. Dos 1.240 metros que abarca o perímetro da antiga mina de extracción de arxila tan só 300 contan con valado na actualidade. Os máis de 900 metros restantes serán dotados de varanda grazas ao convenio de colaboración asinado no seu día polo Concello de Valga e a Consellería de Economía e Industria para financiar os traballos.}

^{Estes consistirán na instalación de talanqueiras e varandas de madeira de pino tratada en autoclave, con postes verticais de formigón prefabricado con acabado en imitación a madeira. Este peche, que terá unha altura de 1’20 metros, será acorde coa morfoloxía do terreo, sen que supoña un impacto visual na paisaxe.}

^{Deste xeito, avánzase un chanzo máis na posta en valor de xeito sustentable deste antigo espazo mineiro para renaturalizar os seus arredores para uso e desfrute da cidadanía. O Concello ten deseñado un proxecto de recuperación de Porto Piñeiro valorado en máis de 14 millóns de euros, con actuacións coma o acondicionamento dunha zona de baño ao aire libre con praia artificial e unha piscina; unha área de usos recreativos e de ocio, con xogos de area e auga, unha zona deportiva e equipamento ciclista. Tamén está prevista unha cávea natural no bordo da lagoa cun escenario flotante, e unha zona de aloxamento con cabanas.}

^{A primeira fase do acondicionamento deste espazo executouse en 2023 cun investimento de máis de 500.000 euros que permitiu habilitar carrís para a circulación de vehículos ciclables e sendas para peóns. Instalouse tamén mobiliario urbano (papeleiras e bancos) nas zonas destinadas ao descanso. Outro dos elementos centrais da obra foi a creación dun parque infantil con equipamento e xogos de madeira.}

^{No que respecta á restauración ambiental desta contorna, aplicáronse tratamentos silvícolas e realizáronse limpezas e rozas selectivas, habilitando novas zonas verdes destinadas ao ocio e ao esparexemento e levando a cabo unha revexetación con bidueiros, acivros, árbores froiteiras e outras especies autóctonas.}

^{Á marxe dos 370.000 euros do convenio coa Xunta para a instalación do peche, o Concello conta con subvencións por valor de 1’2 millóns que están pendentes de investir. Arredor de 600.000 euros serán aportados pola Deputación de Pontevedra a través do programa Pon2030 e a outra metade financiarase con fondos europeos Next Generation, xestionados pola agrupación Mar de Santiago.}