- A veciña de Casal de Eirigo celebrara o pasado mes de setembro o seu 101 aniversario

- Os actos fúnebres na súa memoria celebraranse esta tarde na igrexa do Divino Salvador de Setecoros

^{Valga, 14 de novembro de 2024.}

^{O Concello lamenta o falecemento, na xornada de onte, da centenaria Manuela Duro Fernández, veciña de Casal de Eirigo, e traslada aos seus familiares e achegados as condolencias en nome de toda a Corporación e da veciñanza de Valga.}

^{Manuela Duro era a segunda veciña máis lonxeva de Valga, despois de celebrar no pasado mes de setembro o seu 101 aniversario, unha data na que recibiu a visita do alcalde, José María Bello Maneiro, e das concelleiras Carmen Gómez e Begoña Piñeiro para agasallala e transmitirlle os parabéns.}

^{A capela ardente da centenaria está instalada na sala número 2 do tanatorio San José de Caldas de Reis. Esta tarde, ás 17.00 horas, terá lugar a condución do cadáver ata a igrexa parroquial do Divino Salvador de Setecoros, onde se celebrarán os actos fúnebres na súa memoria.}

^{Nada en Cuntis pero casada en Casal de Eirigo, Manuela Duro foi, durante este século de vida, exemplo de muller traballadora e de persoa con carácter vitalista. Exerceu como modista, ao tempo que atendía o fogar e traballaba as terras. Ademais, foi afeccionada ás artes plásticas e ás manualidades e, en xaneiro deste 2024, o Auditorio Municipal acolleu unha exposición con algunhas das súas creacións.}