- Mañá, coincidindo coa data de nacemento de Ferro Couselo, daranse a coñecer os gañadores

- Os premios das dúas modalidades ascenden a 7.000 euros en total

^{Valga, 29 de xullo de 2024.}

^{O xurado da vixésimo quinta edición do Premio de Investigación Xesús Ferro Couselo reuniuse esta mañá de forma telemática para deliberar sobre os traballos presentados ao certame e elixir aos gañadores das dúas modalidades.}

^{A xuntanza contou coa participación do concelleiro de Cultura, Pedro Calvo, que acompañou ao membros do tribunal: Xulio Rodríguez González, facultativo do Corpo Superior de Museos; Pegerto Saavedra Fernández, Catedrático de Historia Moderna da Universidade de Santiago; Marcial Gondar Portasany, Catedrático de Antropoloxía da Facultade de Filosofía e Ciencias da Educación da USC; e Pablo Sánchez Ferro, director do Arquivo Histórico Provincial de Ourense e neto de Xesús Ferro Couselo. Á reunión tamén se sumaron dous técnicos municipais, Santiago Chenlo e Vanessa Losada, que exerceu como secretaria.}

^{Foron oito as propostas que se presentaron ao certame. Seis investigacións concorreron á primeira modalidade, dotada con 4.000 euros e referida a traballos de investigación de ámbito galego, dentro das especialidades de etnografía, paleografía, numismática, arqueoloxía, historia e historia da arte.}

^{Os outros dous traballos presentáronse á segunda modalidade, pola que se convoca unha bolsa de estudos para proxectos centrados en estudos históricos, etnográficos ou sobre persoeiros do municipio de Valga, dotada con 3.000 euros.}

^{Os gañadores das dúas modalidades daranse a coñecer mañá, día 30 de xullo, cando se cumpren 118 anos do nacemento de Xesús Ferro Couselo.}

^{Este premio busca promover e incentivar os estudos actuais de investigación no campo das ciencias históricas e vén sendo convocado polo Concello dende o ano 1996, no que a Real Academia Galega dedicou o Día das Letras Galegas ao Fillo Predilecto de Valga e insigne figura da cultura galega.}