- O cociñeiro Álex Iglesias estará á fronte das demostracións culinarias nesta edición

- A programación dará comezo o día 1 cun taller de cociña dirixido a nenos de 5 a 12 anos

^{Valga, 23 de xullo de 2024.}

^{O mes de agosto está ao caer e o Concello está a deseñar a programación da principal celebración do verán en Valga: a XXXIV Festa da Anguía e Mostra da Caña do País e, como parte dela, as actividades do Agosto Gastronómico, que se ten convertido xa nunha cita imprescindible.}

^{Showcookings e obradoiros tratarán de sacar, de novo, o máximo partido culinario aos dous produtos protagonistas da festa (a anguía e a augardente), e tamén haberá concursos para que todos poidan facerse partícipes da mesma.}

^{As actividades darán comezo o día 1 de agosto, cun obradoiro de cociña para nenos de entre 5 e 12 anos, que elaborarán dous pratos: un salgado, que terá a anguía entre os seus ingredientes, e un doce. O prazo de inscrición estará aberto dende mañá e ata o 29 de xullo.}

^{Durante todos os martes do mes desenvolveranse catro showcookings nos que se cociñarán en directo diferentes pratos, petiscos e cocteis elaborados con anguía e con caña do país. Á fronte destas actividades estará o cociñeiro Álex Iglesias, copropietario do restaurante Dúas Liñas en Arzúa. Con anterioridade foi tamén cociñeiro nos restaurantes Martín Berasategui (de 2009 a 2010, cando tiña 3 estrelas Michelin), Mugaritz (entre 2010 e 2012, con 2 estrelas Michelin) e foi tamén xefe de cociña no restaurante Cabanas, en Lalín. Tamén fixo incursións no mundo televisivo, presentando o programa “Tupper Club”, na TVG.}

^{O primeiro showcooking, de título “Destapa a anguía”, terá lugar o día 6 e cociñaranse en directo tapas creativas realizadas con este peixe. Haberá outras tres demostracións os días 13, 20 e 27 de agosto: “A caña no prato”, na que se cociñarán catro receitas elaboradas con caña do país; “Universo anguía”, coa preparación de pratos que terán como ingrediente principal a anguía; e “Moito máis que caña”, con degustación de cócteles con augardente. Estas actividades, que se desenvolverán no Centro de Interpretación da Caña, terán un límite de prazas de 25 persoas.}

^{Outra das propostas é o concurso “Anguía Chef”, no que se busca aos mellores cociñeiros de anguía. Equipos integrados por catro persoas competirán o xoves 22 nunha primeira proba eliminatoria na que loitarán para clasificarse para a gran final do día 23. Haberá premios para os gañadores.}

^{Todas estas actividades son gratuítas, pero teñen un carácter solidario. Os inscritos deberán aportar un quilo de alimentos non perecedoiros que, posteriormente, se entregarán ao departamento de Servizos Sociais para a súa distribución entre as familias sen recursos.}

^{As inscricións realizaranse cubrindo as follas de solicitude e presentándoas no Concello ou a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo. no prazo establecido para cada actividade. As solicitudes atenderanse por orde de entrada.}

^{Concursos de fotografías e de receitas}

^{As actividades do “Agosto Gastronómico” complétase con dous concursos de fotografías e receitas. Ao primeiro poden presentarse imaxes relacionadas coa anguía, a caña do país e o Camiño de Santiago ao seu paso por Valga e desenvolverase a través das redes sociais Facebook e Instagram.}

^{En canto ao concurso de receitas de anguía e caña, as persoas interesadas en participar poderán enviar a través de correo electrónico as súas propostas culinarias elaboradas con estes produtos, acompañadas dunha fotografía e unha explicación sobre a súa preparación.}

^{Os premios de ambos certames consistirán en lotes de produtos galegos.}