- A celebración terá lugar o día 13 de xullo e as actuacións comezarán ás 22:30 horas

- Está aberta a inscrición de equipos para participar nas Olimpíadas da Aldea, que repartirán premios por valor de 1.800 euros

^{Valga, 4 de xullo 2024.}

^{A Festa da Xuventude xa conta con programación musical. Ortiga e Loita Amada serán os encargados de animar a noite do 13 de xullo na praia fluvial de Vilarello, escenario tradicional desta celebración que, ademais, ten coma outra das súas actividades centrais as Olimpíadas da Aldea.}

^{As actuacións musicais arrancarán ás 22:30 horas co dúo Loita Armada. O dúo formado por Jásper (cantante e guitarra) e Nébeda Piñeiro (vocalista) caracterízase polo seu son ecléctico, no que mesturan o rock ou o punk coa música tradicional galega, o ska e incluso ritmos latinos.}

^{A mesma filosofía e querenza pola fusión vén marcando a carreira do santiagués Ortiga (Manuel González) dende que empezou o seu proxecto en solitario en 2019, renovando o espírito da verbena galega con misturas de ritmos latinos e sons urbanos. Merengues, cumbias e bachatas combínanse coa música electrónica e co autotune e, para mostra, o seu último éxito: “A nosa verbena”, unha das cancións deste verán. O seu concerto en Vilarello está previsto para as doce da noite.}

^{Inscrición nas Olimpíadas}

^{Ademais do apartado musical, dende as 9 da mañá disputaránse na praia fluvial as Olimpíadas, nas que equipos que representan a diferentes aldeas de Valga, compiten en disciplinas coma fútbol praia, brilé, carreiras de sacos, turrasoga, carreiras de carretilla e unha xincana final.}

^{O prazo de inscrición está aberto ata as 13:00 horas do día 10 de xullo. As follas de inscrición poden descargarse na páxina web municipal (https://www.valga.gal/atencion-cidada/impresos-solicitudes) ou recollerse en papel nas oficinas municipais. Teñen que entregarse debidamente cubertas no rexistro do Concello ou envialas por correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo..}

^{Segundo recollen as bases, os equipos deben estar formados por un mínimo de 4 persoas e un máximo de 6, todos a partir de 15 anos de idade. Serán equipos mixtos e contarán cun mínimo de dúas persoas de cada xénero. En todos os xogos debe haber representación de ambos xéneros.}

^{Ademais, cada equipo deberá contar cun capitán que exercerá de representante ante a organización e cunha vestimenta que o diferencie do resto de conxuntos participantes. En caso de non tela, a organización facilitaralle petos.}

^{En cada xogo outorgaranse as correspondentes medallas de ouro e prata aos primeiros e segundos clasificados, ademais de gratificalos con 200 e 100 euros respectivamente. En total, repartiranse 1.800 euros en premios.}

^{Unha vez rematadas as competicións, designarase ao campión absoluto das Olimpíadas, que será o equipo que máis medallas douradas acumule. En caso de empate, terase en conta tamén o número de medallas de prata. Ademais, entregarase un trofeo á deportividade.}