- Os equipos teñen de prazo ata as 13:00 horas do día 10 de xullo para inscribirse
- Fútbol, brilé, carreiras de sacos, turrasoga, carreiras de carretillas e unha xincana serán os xogos que se disputen na praia de Vilarello
Valga, 24 de xuño de 2024.
As “Olimpíadas da Aldea” están ás portas dunha nova edición, que se disputará durante a xornada do día 13 de xullo na a praia fluvial de Vilarello, que se converterá nunha área multideporte na que os diferentes equipos competirán de forma simultánea nun total de seis disciplinas: Fútbol praia, brilé, carreiras de sacos, turrasoga, carreiras de carretilla e unha xincana final.
O prazo de inscrición nesta actividade, que forma parte da programación da Festa da Xuventude, permanecerá aberto ata as 13:00 horas do día 10 de xullo. As follas de inscrición poden descargarse na páxina web municipal (https://www.valga.gal/atencion-cidada/impresos-solicitudes) ou recollerse en papel nas oficinas municipais. Teñen que entregarse debidamente cubertas no rexistro do Concello ou envialas por correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo..
Segundo recollen as bases, os equipos deben estar formados por un mínimo de 4 persoas e un máximo de 6, todos a partir de 15 anos de idade. Serán equipos mixtos e contarán cun mínimo de dúas persoas de cada xénero. En todos os xogos debe haber representación de ambos xéneros.
Ademais, cada equipo deberá contar cun capitán que exercerá de representante ante a organización e cunha vestimenta que o diferencie do resto de conxuntos participantes. En caso de non tela, a organización facilitaralle petos.
En cada xogo outorgaranse as correspondentes medallas de ouro e prata aos primeiros e segundos clasificados, ademais de gratificalos con 200 e 100 euros respectivamente. En total, repartiranse 1.800 euros en premios.
Unha vez rematadas as competicións, designarase ao campión absoluto das Olimpíadas, que será o equipo que máis medallas douradas acumule. En caso de empate, terase en conta tamén o número de medallas de prata. Ademais, entregarase un trofeo á deportividade.
