- As especies elixidas son diferentes frutais, un magnolio e un ameneiro, ata un total de trinta exemplares

- Os traballos corren a cargo dos aprendices da especialidade de forestais

^{Valga, 23 de abril de 2024.}

^{O grupo de forestais do Obradoiro de Emprego Xóvenes II está a traballar na Mina Mercedes, realizando unha plantación de arborado na zona de acceso á área verde e no parque infantil e deportivo.}

^{Esta práctica, que é dirixida polo docente da especialidade, José Manuel Picallo, corresponde ao módulo de Repoboación Forestal. Os aprendices están a aportar terra negra vexetal para que as raíces poidan expandirse e as árbores non sequen. Outro dos pasos importantes do proceso é realizar cortes nos cepellóns para evitar que as raíces se espiralicen e que o aire non tire os exemplares. Por último, aplican abono de liberación lenta coidando que non quede pegado ás raíces, para non queimalas.}

^{Arredor de cada árbore quedará un corgo para que, cando chova, a auga se acumule e penetre na terra.}

^{As especies que se están a plantar inclúen limoeiros, laranxos, maceiras rabiosas, abeleiras, nogueiras, amendoeiras, freixos, cerdeiras, nísperos, un magnonio e un ameneiro. Serán un total de trinta árbores.}

^{O Obradoiro de Emprego Xóvenes II, no que participan dezaseis mozos de Valga e Moraña nos módulos de forestais e albanelería, foi posto en marcha por estes dous concellos en outubro do pasado ano, cunha subvención da Xunta de Galicia. Está cofinanciado pola Unión Europea mediante o programa FSE+Galicia 2021-2027.}