- A viaxe, organizada polo Concello, incluíu unha ruta de sendeirismo de doce quilómetros en un paseo fluvial polo río

- Os excursionistas achegáronse a diferentes miradoiros para contemplar fermosas panorámicas da zona

^{Valga, 22 de abril de 2024.}

^{Cincuenta veciños de Valga participaron esta fin de semana nunha viaxe á Ribeira Sacra, organizada polo Concello e que incluíu unha ruta de sendeirismo pasando por algúns dos miradoiros máis coñecidos da marxe ourensá do Sil e un percorrido en catamarán polo río.}

^{Os excursionistas, entre os que se atopaba o alcalde, José María Bello Maneiro, partiron dende a Mina Mercedes ás sete da mañá nun autobús que foi financiado polo Concello. Unha vez na Ribeira Sacra, arredor das dez e media, iniciaron a ruta a pé, duns doce quilómetros de lonxitude e guiada por Roi Barcala, de Rutea Travel. Partiron do Mirador da Columna, no municipio de Parada de Sil, dende onte xa puideron contemplar unha fermosa panorámica.}

^{Dende alí avanzaron por un antigo Camiño Real e adentráronse un frondoso bosque que os levou ata a pequena aldea de Vilouxe, xa no concello de Nogueira de Ramuín, para visitar o que está considerado como un dos miradoiros máis bonitos da zona, cunha ampla vista das paredes máis abruptas do canón do Sil. A segunda parte da ruta discorreu polos lugares de Cerreda e Alberguería, onde a expedición fixo unha parada no terceiro miradoiro do día: Pé do Home, cunha perspectiva diferente do val.}

^{Os sendeiristas xantaron durante a ruta e, unha vez rematada a camiñada, foron recollidos de novo polo autobús para trasladalos ata o embarcadoiro de Santo Estevo, onde subiron ao catamarán para o paseo fluvial polo Sil. Durante a navegación, ademais de gozar da paisaxe, coñeceron a historia da viticultura heroica.}