- A festa en homenaxe á poboación máis veterana do concello celebrarase o 19 do vindeiro mes no colexio Ferro Couselo

- Haberá autobuses gratuítos, concerto da Banda Municipal, xantar e moitos agasallos

^{Valga, 11 de abril de 2024.}

^{O Encontro da Terceira Idade celebra o vindeiro 19 de maio unha nova edición, a número vinte e seis, como homenaxe á poboación máis veterana do concello, que poderá participar nunha xornada de confraternidade con diversas actividades lúdicas.}

^{Poden participar os veciños que teñan cumpridos 65 anos ou que os cumpran durante este ano 2024. Nestes días estáselles a informar por carta sobre os detalles do festexo, que nesta ocasión cambia de emprazamento e trasládase ao recinto do colexio Xesús Ferro Couselo. Para asistir haberá autobuses gratuítos, con parada nos lugares habituais.}

^{As inscricións poden realizarse presencialmente no Concello, a través dos números de teléfono 986 55 94 56 (Concello) e 986 55 67 69 (Auditorio) ou enviando un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. O prazo para anotarse estará aberto ata o día 3 de maio.}

^{O programa de actividades previsto para ese domingo dará comezo ás 13:00 horas coa actuación da Banda de Música Municipal de Valga e, a continuación, terá lugar un xantar popular. No transcurso da xornada haberá sorteo de agasallos doados por casas comerciais e entidades de Valga e da contorna e tamén se entregará un recoñecemento ao home e a muller de maior idade que participen no encontro, así coma aos asistentes que estean de aniversario.}

^{A xornada festiva pecharase cun baile.}